བང་ལ་དེཤ་ལུ་ བློན་ཆེན་བགྲེསཔ་ ཨམ་ཤེག་ཧ་སི་ན་དེ་ ཁྲིམས་འདུན་ལུ་ ཉེས་འཛུགས་འབད་དགོ་པའི་ འགྲུལ་བསྐྱོད་འགྲེམ་སྟོན།

ཨཱལ་ཇ་ཟི་ར།
སྤྱི་ཟླ་ ༡༢ པའི་ཚེས་ ༣༡ ལུ་ སྤྱི་ལོ་ ༢༠༢༤ སྤྱི་ཟླ་ ༧ པའི་ནང་ གཞུང་ལུ་ ངོ་རྒོལ་འབདཝ་ད་ མི་སེར་བརྒྱ་ལས་བཅད་དེ་ ཤི་རྐྱེན་བྱུང་མི་དང་འབྲེལ་ཏེ་ བློན་ཆེན་གྱི་ གོ་གནས་ལས་ ཕྱིར་དབྱུངས་འབད་མི་ ཨམ་ཤེག་ཧ་སི་ན་དེ་ ཁྲིམས་ཀྱི་འདུན་སར་ ཉེས་འཛུགས་འབད་དགོ་པའི་ དྲན་སྐུལ་ཐོག་ལས་ རྒྱལ་ས་ཌ་ཀ་ལུ་ མི་སེར་སྟོང་ཕྲག་ལེ་ཤ་ཅིག་གིས་ འགྲུལ་བསྐྱོད་འགྲེམ་སྟོན་འབད་ནུག།
དེ་ཡང་ རྒྱབ་འགལ་འབད་མི་ སློབ་ཕྲུག་སྡེ་ཚན་གྱིས་ གཅིག་སྒྲིལ་གྱི་དོན་ལུ་ འགོ་འདྲེན་འཐབ་ཡོདཔ་ད་ འགྲུལ་བསྐྱོད་སྐབས་ལུ་ མི་སེར་ཚུ་གིས་ ཨམ་ཤེག་ཧ་སི་ན་དེ་ ཁྲིམས་འདུན་ལུ་ ཉེས་འཛུགས་འབད་དགོ་པའི་ཁར་ མོ་གི་སྲིད་ཚོགས་ ཨ་ཝ་མི་ལིག་དེ་ཡང་ ཆ་མེད་གཏང་དགོཔ་སྦེ་ བཤད་ཡོདཔ་ཨིན་པས།
བློན་ཆེན་བགྲེསཔ་ ཨམ་ཧ་སི་ན་དེ་ སྤྱི་ཟླ་ ༨ པའི་ཚེས་ ༥ ལུ་ རྒྱ་གར་ལུ་ བྱོག་སོང་ཡོདཔ་ད་ རྒྱལ་ཁབ་ནང་ ངོ་རྒོལ་འབད་བའི་སྐབས་ལུ་ མོ་གི་བཀོད་རྒྱ་དང་འཁྲིལ་ཏེ་ མི་སེར་བརྒྱ་ཕྲག་ལས་བཅད་དེ་ དམར་བསད་འབད་ཡོདཔ་མ་ཚད་ སྟོང་ཕྲག་ལས་བཅད་མི་ཚུ་ལུ་ཡང་ རྨ་སྐྱོན་བྱུང་ཡོདཔ་སྦེ་ གསལ་བཀོད་འབད་ནུག།
བང་ལ་དེཤ་གིས་ རྒྱ་གར་ལུ་ ཤེག་ཧ་སི་ན་དེ་ མི་ལེ་ཤ་བསད་མི་དང་ འགྲོ་བ་མིའི་ཐོབ་དབང་ལུ་ ཆ་གནས་མ་བཞག་པའི་ གནད་དོན་ཚུ་དང་འབྲེལ་ཏེ་ ཁྲིམས་འདུན་ལུ་ ཉེས་འཛུགས་ལེ་ཤ་འབད་ཡོདཔ་ལས་ བང་ལ་དེཤ་ལུ་ ལོག་གཏང་དགོཔ་སྦེ་ བཤད་ཡོདཔ་ཨིན་པས།
ཌ་ཀ་ལུ་ཡོད་མི་ རྒྱལ་སྤྱི་ཉེས་འགེལ་ཁྲིམས་ཚོགས་ཀྱིས་ ཨམ་ཤེག་ཧ་སི་ན་དང་ མཐུན་ལམ་ཅན་ཚུ་ འཛིན་བཟུང་འབད་དགོ་པའི་ བཀའ་རྒྱ་བཏོན་མི་དང་འབྲེལ་ཏེ་ རྒྱལ་སྤྱི་ཁྲིམས་སྲུང་ལས་ཚོགས་ ཨིན་ཊར་པཱོལ་ལས་ གྲོགས་རམ་ཚུ་ཡང་ ལེན་དོ་ཡོདཔ་སྦེ་བཤད་ནུག།
བང་ལ་དེཤ་གི་ གནས་སྐབས་གཞུང་གིས་ ཨམ་ཧ་སི་ན་དང་ མོ་གི་མཐུན་གྲོས་ཚུ་ ངོ་རྒོལ་འབད་མི་ཚུ་ལུ་ ཤི་རྐྱེན་བྱུང་ཡོད་མི་དང་འབྲེལ་ཏེ་ ཁྲིམས་རྩོད་འབད་ནི་ཨིན་པའི་ ཁས་བླངས་འབད་ཡོདཔ་ད་ དེ་བཟུམ་སྦེ་ ཨམ་ཧ་སི་ན་གིས་ཡང་ ཤི་རྐྱེན་མང་ཤོས་ཅིག་ སྲུང་སྐྱོབ་ལས་སྡེ་ཉག་གཅིག་ལུ་བརྟེན་ཏེ་མིན་པར་ འབྲེལ་བ་ཡོད་མི་ ལས་སྡེ་གཞན་ཚུ་ལུ་བརྟེན་ཏེ་ཡང་ བྱུང་སྲིད་ཡོདཔ་ལས་ དབྱེ་ཞིབ་འབད་དགོཔ་སྦེ་ བཤད་ནུག་ཟེར་ བཀོད་འདུག་པའི་གནས་ཚུལ།

Please follow and like us: