ཌཱན་ཊག་ལས་འགུལ་དང་ འབྲུག་ཚོང་འབྲེལ་ལས་འཛིན་གྱི་བར་ན་ ས་སྣུམ་བཀྲམ་སྤེལ་གྱི་དོན་ལུ་ གོ་བརྡའི་ཆིངས་ཡིག།

པདྨ་བཟངམོ།
སྤྱི་ཟླ་ ༡༢ པའི་ཚེས་ ༣༠ ལུ་ རྒྱ་གར་གྱི་ ས་མཚམས་ལམ་སེལ་ལས་སྡེ་ ཌཱན་ཊག་ལས་འགུལ་དང་ འབྲུག་ཚོང་འབྲེལ་ལས་འཛིན་གྱི་བར་ན་ གོ་བརྡའི་ཆིངས་ཡིག་ཅིག་ལུ་ མཚན་རྟགས་བཀོད་ཡོདཔ་ཨིན་པས།
མཚན་རྟགས་དེ་ཡང་ ཌཱན་ཊག་ལས་འགུལ་གྱི་ བཟོ་རིག་གཙོ་འཛིན་འགོ་དཔོན་ དོ་འཛིན་རོ་ཧིཊ་གུབ་ཏ་དང་ འབྲུག་ཚོང་འབྲེལ་ལས་འཛིན་གྱི་ བཀོད་ཁྱབ་གཙོ་འཛིན་འགོ་དཔོན་གྱི་ཚབ་ བཙན་སྐྱོགས་ ༢ ཀྱིས་བཀོད་ནུག།
ལས་སྡེ་ ༢ ཀྱི་བར་ན་ དེ་བཟུམ་མའི་ གོ་བརྡའི་ཆིངས་ཡིག་ བཟོ་མི་དེ་ཡང་ འབྲུག་རྒྱལ་ཁབ་ནང་གི་ ཌཱན་ཊག་ལས་འགུལ་ལུ་ བཟོ་རིག་འཕྲུལ་ཆས་དང་ ས་རྐོ་འཕྲུལ་གླང་ཚུ་གིས་གཙོས་པའི་ སྣུམ་འཁོར་ཚུ་གི་དོན་ལས་ ས་སྣུམ་པེ་ཊཱོལ་དང་ ཌི་ཟཱལ་ཚུ་ བཀྲམ་སྤེལ་འབད་ཐབས་ལུ་ཨིནམ་ད་ འདས་པའི་ལོ་ངོ་ ༤ གི་ ནང་འཁོད་ལུ་ཡང་ མཉམ་འབྲེལ་གང་དྲག་ བྱུང་ཡོདཔ་ཨིན་པས།
ཆིངས་ཡིག་དེ་ལུ་བརྟེན་ཏེ་ རྒྱ་ཁབ་ནང་ཡོད་མི་ ཌཱན་ཊག་ལས་འགུལ་གྱི་ ལས་ཚན་གེ་རའི་ནང་ ས་སྣུམ་ཚུ་ རྒྱུན་ཆད་མེད་པར་ བཀྲམ་སྤེལ་འབད༌དེ་ ལས་འགུལ་ཚུ་ ལེགས་ཤོམ་སྦེ་ ལག་ལེན་འཐབ་ཚུགས་ནི་ཨིནམ་ད་ འདས་པའི་ལོ་ལུ་ཡང་ དངུལ་ཀྲམ་ས་ཡ་ ༩༧ ལྷགཔ་ཅིག་གི་ ཚོང་འབྲེལ་འཐབ་ནུག།
འབྲུག་ལུ་ ཌཱན་ཊག་ལས་འགུལ་དེ་ སྤྱི་ལོ་ ༡༩༦༡ ལོར་ གཞི་བཙུགས་འབད་ཞིནམ་ལས་ཚུར་ འབྲུག་གི་ས་གནས་མཐའ་ཟུར་དང་ ལུང་ཕྱོགས་ཚུ་ མཐུད་སྦྲེལ་གྱི་དོན་ལས་ འཁོར་ལམ་དང་ ཟམ་དེ་ཚུ་ བཟོ་སྐྲུན་དང་ རྒྱུན་སྐྱོང་འཐབ་ནི་ལུ་ གལ་ཆེ་བའི་ འགན་ཁུར་ཚུ་ འབག་དོ་ཡོདཔ་ཨིན་པའི་གནས་ཚུལ།

Please follow and like us: