ཌོག་ཊར་བློ་གྲོས་ཚེ་རིང་གིས་ འབྲུག་མཉམ་རུབ་ཚོགས་པའི་ གཙོ་འཛིན་ལས་དགོངས་ཞུ།

སྤྱི་ཟླ་ ༡ པའི་ཚེས་ ༧ ལུ་ འབྲུག་མཉམ་རུབ་ཚོགས་པ་གིས་ གནས་ཚུལ་གསར་བཏོན་ཅིག་ནང་ བཀོད་དོ་བཟུམ་འབད་བ་ཅིན་ དྲགོས་ཌོག་ཊར་བློ་གྲོས་ཚེ་རིང་གིས་ འབྲུག་མཉམ་རུབ་ཚོགས་པའི་ གཙོ་འཛིན་ལས་ དགོངས་ཞུ་མཛད་ཡོདཔ་སྦེ་ཨིནམ་ད་ དེ་ཡང་ སྤྱི་ལོ་ ༢༠༢༤ སྤྱི་ཟླ་ ༡༢ པའི་ཚེས་ ༡༧ ལུ་ དགོངས་ཞུའི་ཡི་གུ་ བཙུགས་ཡོདཔ་སྦེ་བཀོད་ནུག།
དེ་སྦེ་ དགོངས་ཞུ་མཛད་མི་དེ་ཡང་ ན་ཧིང་ སྤྱི་ཟླ་ ༡༠ པའི་ནང་ མི་དབང་མངའ་བདག་རིན་པོ་ཆེའི་ཞབས་ལས་ དགེ་ལེགས་ཕུག་ དྲན་ཤེས་ཁྲོམ་ཚོགས་ཀྱི་ སྤྱི་འཛིན་སྦེ་ བསྐོ་བཞག་གནང་ཡོདཔ་བཞིན་དུ་ གཞན་དང་མ་འདྲ་བའི་ ཡར་འཐོན་ཅན་གྱི་ འགན་ཁག་འབད་དགོ་པའི་ གནད་ལུ་བརྟེན་ཏེ་ཨིན་པས།
ཌོག་ཊར་བློ་གྲོས་ཚེ་རིང་གིས་ སྤྱི་ལོ་ ༢༠༡༣ ལུ་ སྲིད་དོན་ཚོགས་པ་ འབྲུག་མཉམ་རུབ་ཚོགས་པའི་ནང་ གྲལ་གཏོགས་མཛད་ཡོདཔ་ད་ སྤྱི་ལོ་ ༢༠༡༨ ལས་ ༢༠༢༣ ཚུན་ ལོ་ངོ་ ༥ གི་རིང་ལུ་ འབྲུག་གི་བློན་ཆེན་སྦེ་ ཕྱག་ཞུ་ནུག།
ཌོག་ཊར་བློ་གྲོས་ཚེ་རིང་གིས་ དགོངས་ཞུ་ཡི་གུའི་ནང་ དགེ་ལེགས་ཕུག་ དྲན་ཤེས་ཁྲོམ་ཚོགས་ཀྱིས་གཙོས་པའི་ རྒྱལ་ཁབ་ཡར་རྒྱས་གོང་འཕེལ་གྱི་ ལས་འགུལ་ཚུ་ལུ་ གུས་ཞབས་བསྐྱེད་དེ་ ཕྱག་ཞུ་ནིའི་དོན་ལས་ཨིན་ཟེར་ བཀོད་ཡོདཔ་ཨིན་པའི་གནས་ཚུལ།

Please follow and like us: