ལྷུན་རྩེ་ཨའུ་མཚོ་རྣམ་གྲོལ་གླིང་ དགོན་འཛིན་གྲྭ་ཚང་ནང་ མགོན་པོ་ཚེ་དཔག་མེད་ཀྱི་ ཚོགས་འབུམ་དང་ ལྷ་ཆེན་དབང་ཕྱུག་གི་ཕྱྭ་ཁུག།

ལྷུན་རྩེ་ཨའུ་མཚོ་རྣམ་གྲོལ་གླིང་ དགོན་འཛིན་གྲྭ་ཚང་ནང་ སྐྱབས་རྗེ་རྗེ་མཁན་རིན་པོ་ཆེ་མཆོག་ དབུ་བཞུགས་ཐོག་ལུ་ བླ་སློབ་དང་ དགེ་སློང་ཞལ་གྲངས་ ༢༠༠ ལྷགཔ་ཅིག་གིས་ ཉིན་གྲངས་ ༣ གྱི་རིང་ལུ་ མགོན་པོ་ཚེ་དཔག་མེད་ཀྱི་ ཚོགས་འབུམ་དང་ ལྷ་ཆེན་དབང་ཕྱུག་གི་སྒོ་ལས་ ཕྱྭ་ཁུག་གཡང་ཁུག་ཚུ་ གནང་ཡོདཔ་ཨིན་པས།

དེ་ཡང་ རང་ཟླ་ ༡ པའི་ཚེས་ ༢༥ སྤྱི་ཟླ་ ༣ པའི་ཚེས་ ༢༤ ལས་ འགོ་བཙུགས་ཏེ་ རང་ཟླ་ ༡ པའི་ཚེས་ ༢༧ སྤྱི་ཟླ་ ༣ པའི་ཚེས་ ༢༦ ལུ་ གྲོལ་གནང་ཡོདཔ་སྦེ་ ཨའུ་མཚོ་རྣམ་གྲོལ་གླིང་ དགོན་འཛིན་གྲྭ་ཚང་གི་ ཕེཛ་བུག་ནང་བཀོད་ནུག།

དེ་བཟུམ་མའི་ ཚོགས་འབུམ་དང་ ཕྱྭ་ཁུག་དེ་ སྐྱབས་རྗེ་རྗེ་མཁན་རིན་པོ་ཆེ་མཆོག་གིས་ སྦྱིན་བདག་མཛད་ཐོག་ལས་ གནང་ཡོདཔ་ད་ དེ་ཡང་ སྤྱིར་འཛམ་གླིང་རྒྱལ་སྤྱིའི་ སྐུ་རིམ་དང་ ལྷག་པར་དུ་ མི་དབང་ཡབ་མེས་སྲས་ ༣ གྱིས་ དབུ་གཙོས་པའི་ མི་དབང་སྐུ་འཁོར་ལྷན་རྒྱས་ཚུ་གི་ སྐུ་རིམ་ལུ་དམིགས་ཏེ་ གནང་ཡོདཔ་ཨིན་པའི་ གནས་ཚུལ་མདོར་བསྡུས།