ཆེ་མཐོ་ཁྲིམས་འདུན་ལས་ བསོད་ནམས་ནོར་བུ་ལུ་ ཉེས་ཁྲིམས་ཚེ་བཙོན།

སྤྱི་ལོ་ ༢༠༢༣ ལོར་ སྐྱེས་ལོ་ ༣༩ འབད་མི་ བསོད་ནམས་ནོར་བུ་དེ་ སྐྱེས་ལོ་ ༢༤ འབད་མི་ རྣམ་རྒྱལ་སྒྲོལ་དཀར་ དམར་བསད་འབད་བའི་ དོགས་ཟོན་ཐོག་ལུ་ འཛིན་བཟུང་འབད་བའི་ཤུལ་ལས་ རྒྱལ་གཞུང་འབྲུག་གི་འགག་སྡེ་གིས་ ཞིབ་དཔྱད་ཚུ་འབད་དེ་ རྩོད་བཤེར་དེ་ རྩོད་དཔོན་ཡོངས་ཁྱབ་ཡིག་ཚང་ལུ་ ཕུལ་ཡོདཔ་ཨིན་པས།
རྩོད་དཔོན་ཡོངས་ཁྱབ་ཡིག་ཚང་གིས་ རྩོད་བཤེར་དེ་ ཐིམ་ཕུ་རྫོང་ཁག་ཁྲིམས་འདུན་ལུ་ ཕུལ་བའི་ཤུལ་ལས་ ཉེས་དོགས་པ་དེ་ལུ་ ལོ་ངོ་ ༡༥ དེ་ཅིག་གི་ བཙོན་ཁྲིམས་བཀལ་ནུག།
ཨིན་རུང་ རྩོད་དཔོན་ཡོངས་ཁྱབ་ཡིག་ཚང་གིས་ ཐིམ་ཕུ་རྫོང་ཁག་ཁྲིམས་འདུན་གྱི་ འཁྲུན་ཆོད་དེ་ལུ་ བསམ་པ་མ་རྫོགས་པར་ ཆེ་མཐོ་ཁྲིམས་ཀྱི་འདུན་སར་ མཐོ་གཏུགས་ཞུ་ཡོདཔ་བཞིན་དུ་ ཆེ་མཐོ་ཁྲིམས་འདུན་ལས་ ཞིབ་དཔྱད་ཚུ་ མཐིལ་ཕྱིན་མཛད་པའི་སྐབས་ལུ་ ཉེས་དོགས་པ་གིས་ སྔོན་གོང་ལས་ དམར་བསད་ཀྱི་ ཀུན་སློང་ཐོག་ལུ་ ཚེ་འདས་རྣམ་རྒྱལ་སྒྲོལ་དཀར་དེ་ དམར་བསད་འབད་ཡོད་པའི་ སྒྲུབ་བྱེད་ཚུ་ ཐོབ་ཡོདཔ་སྦེ་ཨིན་པས།
དེ་འབདཝ་ལས་ སྤྱི་ལོ་ ༢༠༢༥ སྤྱི་ཟླ་ ༣ པའི་ཚེས་ ༢༧ ལུ་ ཆེ་མཐོའི་ཁྲིམས་འདུན་ལས་ རྫོང་ཁག་ཁྲིམས་འདུན་གྱི་ འཁྲུན་ཆོད་དེ་ལུ་ སྒྱུར་བཅོས་གནང་སྟེ་ བསོད་ནམས་ནོར་བུ་ལུ་ ཚེ་བཙོན་གྱི་ འཁྲུན་ཆོད་གནང་ནུག།
དེ་ཡང་ ཐད་ཀར་གྱི་ དཔང་བཞག་དང་ ཁས་ལེན་ཚུ་མེད་རུང་ འབྲུག་གི་སྒྲུབ་བྱེད་བཅའ་ཁྲིམས་ ༢༠༠༥ ཅན་མའི་ དོན་ཚན་ ༥ (ཁ) པ་དང་ ༨༨ པ་ལྟར་དུ་ བསོད་ནམས་ནོར་བུ་གིས་ རྣམ་རྒྱལ་སྒྲོལ་དཀར་དེ་ དམར་བསད་འབད་ནི་ལུ་ སྔོན་འཆར་བརྩམས་ཡོདཔ་སྦེ་ ཡིད་ཆེས་རུང་བའི་ མངོན་གསལ་བྱུང་ཡོད་པའི་གནས་ཚུལ།

Please follow and like us: