ཇར་མ་ནི་ལུ་ ཌོག་ཊར་ཅིག་གིས་ སྲོག་གཅོད་སྨན་རྫས་ཚུ་བྱིན་ཏེ་ ནདཔ་ ༡༥ དམར་བསད་འབད་ཡོད་པའི་ཉེས་འཛུགས

བི་བི་སི།
ཇར་མ་ནི་ལུ་ ཌོག་ཊར་ཅིག་གིས་ སྲོག་གཅོད་སྨན་རྫས་ཚུ་ ལག་ལེན་འཐབ་སྟེ་ ནདཔ་ ༡༥ དམར་བསད་འབད་ཡོད་པའི་ ཉེས་འཛུགས་བཀལ་ཐོག་ལུ་ ཁྲིམས་སྲུང་འགག་སྡེའི་ དོ་དམ་འོག་ལུ་ བཞག་ཡོདཔ་ཨིན་པས།
དེ་ཡང་ བཱར་ལིན་གྱི་ ཁྲིམས་རྩོད་པ་ཚུ་གིས་ སྐྱེས་ལོ་ ༤༠ ལང་མི་ དོགས་པ་ཅན་ ཌོག་ཊར་ཕོ་སྐྱེས་དེ་གིས་ ཁོ་རའི་སྐྱོན་བསུབ་ཀྱི་དོན་ལས་ ཉམས་རྒུདཔ་ལ་ལོ་ཅིག་གི་ སྡོད་ཁྱིམ་ཚུ་གི་ ཁང་མིག་ནང་ཡང་ མེར་སྤར་ཡོད་པའི་ ཉེས་འཛུགས་བཀལ་ནུག།
ཌོག་ཊར་དེ་གིས་ སྤྱི་ལོ་ ༢༠༢༡ སྤྱི་ཟླ་ ༩ པ་ལས་ སྤྱི་ལོ་ ༢༠༢༤ སྤྱི་ཟླ་ ༧ པ་ཚུན་ལུ་ ཨམ་སྲུ་ ༡༢ དང་ ཕོ་སྐྱེས་ ༣ བསད་ཡོད་པའི་ ཉེས་འཛུགས་བཀལ་ཡོད་རུང་ ཁྲིམས་རྩོདཔ་ཚུ་གིས་ བཤད་དོ་བཟུམ་འབད་བ་ཅིན་ དེ་བ་ལྷགཔ་སྦེ་ བསད་ཡོད་པའི་ དོགས་པ་ཡོད་ཟེར་ཨིན་པས།
ཇར་མ་ནི་ལུ་ སྒེར་གྱི་ཁྲིམས་ལུགས་ དམ་དྲགས་ཡོད་མི་ལུ་བརྟེན་ མིང་མ་བཀོད་མི་ དྲུང་འཚོ་དེ་གིས་ ཉེས་འཛུགས་བཀལ་མི་ལུ་ ད་ཚུན་གྱི་བར་ན་ ངོས་ལེན་འབད་མ་བཏུབ་པའི་སྐོར་ལས་ ཁྲིམས་རྩོད་པ་ཚུ་གིས་ གསལ་བཤད་འབད་ནུག།
ཌོག་ཊར་ཕོ་སྐྱེས་དེ་གིས་ ནདཔ་ཚུ་ལུ་ ཤེས་རྟོགས་དང་ གནང་བ་མེད་པར་ སྨན་བཅོས་དང་ རྩ་རྒྱུས་བདེ་ཏོག་ཏོ་ བཟོ་ནི་གི་ སྨན་དེ་ཚུ་ བྱིན་ཡོད་པའི་ ཉེས་འཛུགས་ཚུ་ཡང་ བཀལ་ཡོདཔ་ཨིན་པས།
ཁྲིམས་སྲུང་འགག་སྡེ་གིས་ སྨན་དེ་ལུ་བརྟེན་ཏེ་ དབུགས་གཏོང་ལེན་གྱི་ རྩ་རྒྱུས་ཚུ་ སྤར་མ་ཚུགས་པར་ སྐར་མ་དག་པ་ཅིག་གི་ ནང་འཁོད་ལུ་ར་ ཤི་རྐྱེན་བྱུང་ཡོད་པའི་སྐོར་ལས་ གསལ་བསྒྲགས་འབད་ནུག།
ཌོག་ཊར་དེ་གིས་ ཇར་མ་ནིའི་ མངའ་སྡེ་ལེ་ཤ་ཅིག་གི་ནང་ར་ ལཱ་འབད་ཡོདཔ་ད་ ཤི་རྐྱེན་བྱུང་མི་ཚུ་གི་ ལོ་ཚད་དེ་ སྐྱེས་ལོ་ ༢༥ ལས་ ༩༤ ཚུན་གྱི་བར་ན་ འོང་ནི་ཨིནམ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: