མཐའ་ཡས་ལེན་གྱི་ མི་དབང་རྒྱལ་བཙུན་རྣམ་ ༢ ཀྱིས་ འབྲུག་གི་རྩེད་རིགས་ཚུ་ནང་གྲལ་བཞུགས།

སྤྱི་ཟླ་ ༤ པའི་ཚེས་ ༢༧ ལུ་ མི་དབང་མངའ་བདག་རིན་པོ་ཆེ་མཆོག་དང་ མི་དབང་རྒྱལ་བཙུན་མཆོག་གིས་ མཐའ་ཡས་ལེན་གྱི་ མི་དབང་རྒྱལཔོ་དང་ མི་དབང་རྒྱལ་བཙུན་རྣམ་ ༢ གླིང་ག་ནང་ཕོ་བྲང་ནང་ མགྲོན་ཞུ་མཛད་གནང་ནུག།

དེ་བསྒང་ མཐའ་ཡས་ལེན་གྱི་ མི་དབང་རྒྱལ་བཙུན་རྣམ་ ༢ ལུ་ འབྲུག་གི་ལམ་སྲོལ་དང་ ལག་རྩལ་གྱི་ ཉམས་མྱོང་དོན་ལས་ རང་ལུགས་མདའ་རྩེད་དང་ ཁུ་རུ་ སོག་སོགམ་ཚུ་གིས་གཙོས་པའི་ འབྲུག་གི་ལག་རྩལ་དང་ ལྷ་བྲིས་ ནང་འཁོད་ཐོན་སྐྱེད་ཚུ་གི་ འགྲེམ་སྟོན་ཅིག་ཡང་ འགོ་འདྲེན་འཐབ་ཡོདཔ་ཨིན་པས།

དེ་ཚེ་ཉིན་མར་ མཐའ་ཡས་ལེན་གྱི་ མི་དབང་རྒྱལ་བཙུན་རྣམ་ ༢ བཀའ་རྒྱ་ཁྲོམ་ཁར་ གཟིགས་སྐོར་ལུ་ ཕེབས་པའི་སྐབས་ མི་དབང་རྒྱལ་སྲས་ འཇིགས་རྒྱལ་ཨྱོན་དབང་ཕྱུག་མཆོག་དང་ མི་དབང་རྒྱལ་སྲས་ འཇིགས་མེད་རྡོ་རྗེ་དབང་ཕྱུག་ དེ་ལས་ མི་དབང་རྒྱལ་སྲས་ ཨྱོན་འཇིགས་མེད་དབང་ཕྱུག་ཚུ་གིས་ ཕེབས་བསུ་ཞུ་ཡོདཔ་ད་ བདེ་སྲུངཔ་ཚུ་གིས་ བདེ་སྲུང་རིག་རྩལ་གོང་འཕེལ་ལས་རིམ་མ་འདྲཝ་ཚུ་ འགྲེམ་སྟོན་འབད་བའི་ཁར་ ཟློས་གར་གྱི་ གཟིགས་སྟོན་ཅིག་ཡང་ འགོ་འདྲེན་འཐབ་ནུག།

དེ་མ་ཚད་ མཐའ་ཡས་ལེན་གྱི་ མི་དབང་རྒྱལ་བཙུན་རྣམ་ ༢ ཀྱིས་ བཀའ་རྒྱ་ཁྲོམ་ནང་ སོ་ནམ་ཞིང་པ་ཚུ་དང་ ལག་རྩལཔ་ཚུ་གི་ ས་གནས་ཀྱི་ འཐོན་སྐྱེད་དང་ ལག་བཟོའི་འཐོན་སྐྱེད་ཚུ་ལུ་ཡང་ གཟིགས་ཞིབ་གནང་ཡོདཔ་ཨིན་པས།

མཐའ་ཡས་ལེན་གྱི་ མི་དབང་རྒྱལཔོ་མཆོག་དང་ མི་དབང་རྒྱལ་བཙུན་མཆོག་ མི་དབང་མངའ་བདག་རིན་པོ་ཆེ་མཆོག་གིས་ མགྲོན་བརྡ་ཕུལ་གནངམ་བཞིན་དུ་ འབྲུག་ལུ་ ཉིན་གྲངས་ ༤ གི་ གཞུང་དོན་གཟིགས་སྐོར་ལུ་ བྱོན་ཡོད་པའི་གནས་ཚུལ།