དྲག་ཤོས་ཀརྨ་ལྷ་མོ་རྡོ་རྗེ་གིས་ ངོ་སྤྲོད་ཀྱི་ ཡིག་ཆ་ཕུལ་ཡོདཔ།

སྤྱི་ཟླ་ ༥ པའི་ཚེས་ ༡༩ ལུ་ དྲག་ཤོས་ཀརྨ་ལྷ་མོ་རྡོ་རྗེ་གིས་ བང་ལ་དེཤ་གི་སྲིད་འཛིན་ མོ་ཧ་མེད་ ཤ་ཧ་བུ་དིན་མཆོག་ལུ་ འབྲུག་རྒྱལ་ཁབ་ལས་ བང་ལ་དེཤ་རྒྱལ་ཁབ་ལུ་ འབྲུག་གི་གཞུང་ཚབ་སྦེ་ བསྐོ་ཞག་གྲུབ་པའི་ ངོ་སྤྲོད་ཡིག་ཆས་ཚུ་ སྲིད་འཛིན་གྱི་ གཞུང་འབྲེལ་ཕོ་བྲང་ བངྒ་བཱ་བཱན་ནང་སྦེ་ རྟེན་འབྲེལ་བརྩི་སྲུང་ཐོག་ལས་ ཕུལ་ཡོདཔ་ཨིན་པས།

དེ་གི་ཤུལ་ལས་ དྲག་ཤོས་ཀརྨ་ལྷ་མོ་རྡོ་རྗེ་གིས་ སྲིད་འཛིན་མཆོག་གི་ སྐུ་མདུན་ལུ་བཅར་ཏེ་ མི་དབང་སྐུ་འཁོར་ལྷན་རྒྱས་དང་ འབྲུག་གི་མི་སེར་ཚུ་ལས་ བང་ལ་དེཤ་གི་ སྲིད་འཛིན་དང་ མི་སེར་ཚུ་ལུ་ བཀྲ་ཤིས་ལེགས་སྨོན་ཡོད་ལུགས་ཚུ་ ཞུ་ཡོདཔ་མ་ཚད་ མོ་གིས་ རྒྱལ་ཁབ་ ༢ ཀྱི་བར་ན་ ཡུན་རིང་གི་ མཐུན་ལམ་དམ་གཟབ་ཡོད་མི་དེ་ ཧེང་སྐལ་ར་ བཙན་ཐབས་འབད་ནི་ལུ་ ཁས་ལེན་ཡོད་ལུགས་ཚུ་ཡང་ཞུ་ནུག།

དྲག་ཤོས་ཀརྨ་ལྷ་མོ་རྡོ་རྗེ་དེ་ བང་ལ་དེཤ་ལུ་ འབྲུག་གི་གཞུང་ཚབ་ ༡༤ པ་ཨིནམ་ད་ མོ་གིས་ ཀོ་རི་ཡ་དང་ མཱལ་དིབཛ་ ཤྲཱི་ལངྐ་ པ་ཀིཛ་ཏཱན་ རྒྱལ་ཁབ་ཚུ་ལུ་ཡང་ བང་ལ་དེཤ་ལུ་ གནས་སྡོད་ཐོག་ལས་ གཞུང་ཚབ་ཀྱི་ ལཱ་འགན་འབག་ནི་ཨིན་པའི་གནས་ཚུལ།