སྤུངས་ཐིམ་དགེ་འདུན་གྲྭ་ཚང་ གནམ་བྱཱར་གྱི་བཞུགས་གནས་ ཐིམ་ཕུ་ལུ་ གསོལ་ཐབ་ཕེས་ཡོདཔ།

གནམ་ལོ་ཤིང་སྦྲུལ་ཟླཝ་ ༤ པའི་ཚེས་ ༡ སྤྱི་ཟླ་ ༥ པའི་ཚེས་ ༢༨ ལུ་ སྐྱབས་མགོན་ཆོས་ཀྱི་རྒྱལ་པོ་ དཔལ་འབྲུག་པ་རིན་པོ་ཆེ་ ཞབས་དྲུང་ངག་དབང་རྣམ་རྒྱལ་མཆོག་གི་ སྐུ་འབག་ཁམས་གསུམ་ཟིལ་གནོན་དང་ ནང་རྟེན་བྱིན་ཅན་ མང་རབས་ཅིག་དང་བཅསཔ་སྦེ་ སྤུངས་ཐིམ་གྲྭ་ཚང་ལྟེ་བའི་ རྡོར་སློབ་རིན་པོ་ཆེ་གིས་ དབུ་གཙོས་པའི་ སློབ་དཔོན་ལྷན་རྒྱས་ཚུ་དང་ འཕགས་ཚོགས་དགེ་འདུན་པ་ཚུ་ བཀྲིས་ཆོས་རྫོང་ནང་ གསོལ་ཐབ་ཕེབས་གནང་ཡི།

དེ་བསྒང་ གཞུང་བློན་ཆེན་གྱིས་གཙོས་པའི་ བློན་པོ་ལྷན་རྒྱས་ཚུ་དང་ ཆེ་བསྟོད་ཅན་གྱི་འཐུས་མི་ དེ་ལས་ ཞི་དྲག་ལས་ཁུངས་ཁག་གི་ འགོ་དཔོན་ཚུ་གིས་ ཕེབས་བསུ་ཞུ་ཡོདཔ་མ་ཚད་ གཞུང་ལམ་གྱི་ གཡས་གཡོན་ལས་ དད་ཅན་མི་སེར་ཚུ་གིས་ ནང་རྟེན་བྱིན་ཅན་ཚུ་ལས་ དབང་དང་ བྱིན་རླབས་ཚུ་ ཞུ་ཡོདཔ་ཨིན་པས།

དེ་ཡང་ རང་ཟླ་ ༣ པའི་ཚེས་ ༣༠ ལུ་ གནམ་དགུན་གྱི་བཞུགས་གནས་ སྤུངས་ཐང་བདེ་བ་ཆེན་བ་ཆེན་པོའི་ཕོ་བྲང་ལས་ གནམ་བྱཱར་གྱི་བཞུགས་གནས་ ཐིམ་ཕུ་ལུ་ ཆིབས་བསྐྱོད་གནང་ཡོདཔ་བཞིན་དུ་ དེ་ཚེ་ཕྱི་རོ་ དགུང་ཞག་སེམས་རྟོགས་ཁ་ གསང་ཟབ་ཆོས་རྫོང་ནང་བཞུགས་ནུག།

སྤུངས་ཐིམ་གྲྭ་ཚང་གི་ འཕགས་པའི་དགེ་འདུན་པ་ཚུ་ ད་ལས་ཕར་ ཟླ་ངོ་ ༦ གི་རིང་ལུ་ ཐིམ་ཕུ་བཀྲིས་ཆོས་རྫོང་ནང་ བཞུགས་ནི་དང་ དེ་ལས་ རང་ཟླ་ ༡༠ པའི་ཚེས་ ༡ ལུ་ ལོག་སྟེ་ར་ གནམ་དགུན་གྱི་བཞུགས་གནས་ སྤུངས་ཐང་བདེ་བ་ཆེན་པོའི་ཕོ་བྲང་ནང་ གསོལ་ཐབ་ཕེབས་གནང་ནི་ཨིན་པས།

དེ་སྦེ་ གཞུང་ཕན་ཚུན་ ༢ ལུ་ གསོལ་ཐབ་བྱོན་ནི་གི་ སྲོལ་བཟང་དེ་ཡང་ དུས་རབ་ ༡༧ པའི་ནང་ སྐྱབས་མགོན་ངག་དབང་རྣམ་རྒྱལ་མཆོག་ ཞལ་བཞུགས་པའི་སྐབས་ལས་ར་ འགོ་བཙུགས་གནང་ཡོད་པའི་གནས་ཚུལ།