རྒྱ་གར་གྱི་ བྱང་ཤར་ལུང་ཕྱོགས་ནང་ ཆུ་རུད་སྦོམ་སྦེ་ར་ ཐོན་ཡོདཔ་ལས་ མི་གྲངས་ ༣༤ ལུ་ཤི་རྐྱེན།

རོའི་ཊརཛ།

སྤྱི་ཟླ་ ༦ པའི་ཚེས་ ༢ ལུ་ རྒྱ་གར་གྱི་ དབང་འཛིན་ཚུ་གིས་ བཤད་དོ་བཟུམ་འབད་བ་ཅིན་ འདས་པའི་ཉིན་ཞག་ ༤ གི་རིང་ལུ་ རྒྱ་གར་གྱི་ བྱང་ཤར་ལུང་ཕྱོགས་ནང་ ཆུ་རུད་སྦོམ་སྦེ་ར་ ཐོན་ཡོདཔ་ལས་ མི་གྲངས་ ༣༤ ལུ་ ཤི་རྐྱེན་བྱུང་ནུག་ཟེར་ཨིནམ་ད་ གནམ་གཤིས་ལས་ཁུངས་ཀྱིས་ ད་རུང་ཡང་ ཆརཔ་ཤུགས་སྦེ་ རྐྱབ་ནི་ཨིན་པའི་ སྔོན་དཔག་འབད་ནུག།

དེ་མ་ཚད་ ཧི་མ་ལ་ཡའི་མངའ་སྡེ་ འབྲས་ལྗོངས་ལུ་ཡང་ བལྟ་བཤལཔ་སྟོང་ཕྲག་ ༡ ལྷགཔ་ཅིག་ བཀག་བཞག་ཡོདཔ་ད་ མེ་གྷ་ལ་ཡ་མངའ་སྡེའི་ ས་ཁོངས་ཚུ་ནང་ཆུ་རུད་ཐོན་སར་ཡང་ མི་གྲངས་ ༥༠༠ ལྷགཔ་ཅིག་ ཉེན་སྐྱོབ་འབད་ནིའི་དོན་ལུ་ དམག་མིའི་སྡེ་ཚན་ཚུ་ བཙུགས་ཡོདཔ་སྦེ་ཨིན་པས།

དེ་བཟུམ་སྦེ་ ཁྱིམ་མཚེས་རྒྱལ་ཁབ་ བང་ལ་དེཤ་གི་ བྱང་ཤར་སིལ་ལེཊ་ རྫོང་ཁག་ནང་ཡང་ ས་རུད་ཐོན་མི་ལུ་བརྟེན་ཏེ་ བཟའ་ཚང་གཅིག་གི་ འཐུས་མི་ ༤ དེ་ཅིག་ལུ་ ཤི་རྐྱེན་བྱུང་ཡོདཔ་ད་ རི་ལྡན་རྫོང་ཁག་ རང་ག་མ་ཏི་དང་ བཱན་ཌར་བཱན་ དེ་ལས་ ཁག་ར་ཅ་རི་ཚུ་གི་ནང་ གནས་སྐབས་ཀྱི་ སྡོད་སྒར་བརྒྱ་ལས་བཅད་དེ་ སྒོ་ཕྱེ་ནུག།

དབང་འཛིན་ཚུ་གིས་ ད་རུང་ཡང་ ས་རུད་དང་ ཆུ་རུད་ཚུ་ འཐོན་ནི་གི་ ཉེན་བརྡ་འབད་ཡོདཔ་མ་ཚད་ ཉེན་ཁ་ཅན་གྱི་ ས་ཁོངས་ཚུ་ནང་ སྡོད་མི་ཚུ་ལུ་ཡང་ དྲན་ཤེས་སྟོན་དགོ་པའི་ བརྡ་ལེན་འབད་ཡོདཔ་ཨིན་པས།

རྒྱ་གར་གྱི་ བྱང་ཤར་དང་ བང་ལ་དེཤ་ལུ་ ཆརཔ་ཤུགས་སྦེ་ རྐྱབ་མི་ལུ་བརྟེན་ཏེ་ ལོ་བསྟར་བཞིན་དུ་ མི་ས་ཡ་ལས་བཅད་མི་ཚུ་ལུ་ གནོད་སྐྱོན་བྱུང་དོ་ཡོདཔ་ད་ ཨ་སམ་མངའ་སྡེའི་ སིལ་ཅར་ཁྲོམ་སྡེའི་ནང་ཡང་ ཆུ་རུད་ཀྱིས་ འཁོར་ལམ་དང་ སྡོད་ཁྱིམ་ཚུ་ལུ་ གནོད་སྐྱོན་བྱུང་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།