དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ གསང་སྔགས་རྡོ་རྗེ་ཐེག་པའི་ རྫོང་གཞི་དང་ མཆོད་རྟེན་གསར་བཞེངས་ལུ་ མ་དངུལ་ཞལ་འདེབས།

རང་ཟླ་ ༤ པའི་ཚེས་ ༡༦ སྤྱི་ཟླ་ ༦ པའི་ཚེས་ ༡༢ ལུ་ ཀུན་གསལ་ཕོ་བྲང་གི་ བླམ་རིན་ཆེན་ཆོས་བཟང་གིས་ ཀུན་གསལ་ཕོ་བྲང་ སྟོན་པ་རྡོར་གདན་མའི་ སྐུ་མདུན་ལུ་སྦེ་ སྐྱབས་རྗེ་རིན་པོ་ཆེ་མཆོག་ལུ་ དངུལ་ཀྲམ་འབུམ་ ༢༠ ཞལ་འདེབས་སྦེ་ཕུལ་ནུག།
དེ་ཡང་ འབྲུག་མི་ཡོངས་ཀྱི་ སྤྱི་གཙུག་གི་ཉི་ཟླ་ བཀའ་དྲིན་འགྲན་ཟླ་དང་བྲལ་བ་ དཔལ་མི་དབང་མངའ་བདག་རིན་པོ་ཆེ་མཆོག་གི་ ཐུགས་དགོངས་ལས་འཁྲུངས་པའི་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ གཞུང་གྲྭ་ཚང་གིས་ གསང་སྔགས་རྡོ་རྗེ་ཐེག་པའི་ རྫོང་གཞི་གསར་བཞེངས་ཀྱི་དོན་ལུ་ དངུལ་ཀྲམ་འབུམ་ ༡༠ དང་ སྐྱབས་རྗེ་རིན་པོ་ཆེའི་ བཀའ་དགོངས་ལྟར་དུ་ བླམ་ཚེ་རིང་དབང་འདུས་མཆོག་གིས་ འགོ་འདྲེན་ཐོག་ལུ་ བཞེངས་གནང་ནི་ཨིན་མི་ བཀྲིས་སྒོ་མང་མཆོད་རྟེན་གྱི་དོན་ལུ་ དངུལ་ཀྲམ་འབུམ་ ༡༠ ཕུལ་ཡོདཔ་ཨིན་པས།
དེ་བཟུམ་སྦེ་ སྟོན་པའི་དུས་ཆེན་ལྔ་འཛོམས་དང་འབྲེལ་ཏེ་ དངུམ་ཀྲམ་འབུམ་ ༣ དང་ སྟོང་ཕྲག་ ༧ གནས་པའི་ སྟོན་པའི་སྐུ་འདྲ་ ༡༣ ཡང་ སྟོན་པའི་སྐུ་མདུན་ལུ་ ཕུལ་ཡོདཔ་མ་ཚད་ དགེ་འདུན་དམངས་ཁར་ཡང་ བླམ་ཁོ་ར་གིས་ ཕྱོགས་སྒྲིག་མཛད་མི་ དཔལ་ལྡན་འབྲུག་པའི་ལུགས་ཀྱི་ ཞལ་འདོན་ཕྱོགས་བསྡེབས་ དཔེ་དེབ་སྟོང་ཕྲག་ ༥༠ ཆོས་སྦྱིན་སྦེ་ ཕུལ་ཡོད་པའི་གནས་ཚུལ།

Please follow and like us: