ཨི་རག་གི་ ཚོང་འབྲེལ་ལྟེ་བ་ཅིག་ལུ་ མེ་རྐྱེན་བྱུང་སྟེ་ མི་གྲངས་ ༦༡ དེ་ཅིག་ལུ་ཤི་རྐྱེན།

བི་བི་སི།

ཨི་རག་གི་ ཀུཊ་ཁྲོམ་སྡེའི་ནང་ ཐོག་ཚད་ ༥ འབད་མི་ ཚོང་འབྲེལ་ལྟེ་བ་ཅིག་ མེ་གིས་འཚིགས་སོངཔ་ལས་ མི་གྲངས་ ༦༡ དེ་ཅིག་ལུ་ ཤི་རྐྱེན་བྱུང་ཡོདཔ་སྦེ་ འགོ་དཔོན་ཚུ་གིས་ བཤདཔ་ཨིན་པས།

ཉིན་གྲངས་ ༧ གྱི་ཧེ་མ་ སྒོ་ཕྱེ་མི་ ཚོང་ཁང་དེ་ནང་ སྤྱི་ཟླ་ ༧ པའི་ཚེས་ ༡༦ གི་ནུབ་མོར་ མེ་རྐྱེན་བྱུང་ཡོདཔ་ད་ དུས་དེ་ལས་ཚུར་ ཚད་འཛིན་འབད་ཚུགས་པར་ཡོདཔ་ད་ མེ་བསད་མི་ཚུ་གིས་ ཚོང་ཁང་གི་ ཁྱིམ་ཏོག་གུ་ལས་སྦེ་ མི་དེ་ཚུ་ སྲོག་སྐྱབས་འབད་ཡོད་རུང་ ད་ལྟོའི་བར་ན་ཡང་ མི་མང་ཤོས་ཅིག་ བརླག་སྟོར་ཤོར་ཡོདཔ་སྦེ་ སྙན་ཞུ་འབད་ནུག།

ལུང་ཕྱོགས་གཙོ་འཛིན་ མོ་ཧམ་མཱད་ ཨཱལ་མི་ཡ་ཧི་གིས་ བཤད་དོ་བཟུམ་འབད་བ་ཅིན་ དེ་བཟུམ་མའི་ རྐྱེན་ངན་བྱུང་མིའི་སྐོར་ལས་ ཚོང་འབྲེལ་ལྟེ་བའི་ ཇོ་བདག་ལུ་ ཁྲིམས་མཐུན་གྱི་ དང་ལེན་འབད་འོང་ཟེར་ཨིན་པས།

དེ་བསྒང་ མང་ཤོས་ཅིག་ར་ ཁྲུས་ཁང་ནང་ དབུགས་འགག་སྟེ་ ཤི་རྐྱེན་བྱུང་ཡོདཔ་ད་ ད་ལྟོ་ཡང་ ཕུངམོ་ ༡༤ དེ་ཅིག་ ངོས་འཛིན་འབད་མ་ཚུགས་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།