གཞུང་གྲྭ་ཚང་གི་ མཚན་སློབ་སྐུ་བགྲེས་ སངས་རྒྱས་རྡོ་རྗེ་མཆོག་ དགོངས་པ་ཆོས་དབྱིངས་ལུ་ཐིམས་པའི་ ཚུལ་སྟོན་གནང་ཡོདཔ།

མགོན་པོ་རྡོ་རྗེ།

གནམ་ལོ་ཤིང་སྦྲུལ་ཟླཝ་ ༦ པའི་ཚེས་ ༢ སྤྱི་ཟླ་ ༧ པའི་ཚེས་ ༢༦ ལུ་ གཞུང་གྲྭ་ཚང་གི་ མཚན་སློབ་སྐུ་བགྲེས་ སངས་རྒྱས་རྡོ་རྗེ་མཆོག་ དགུང་ལོ་ ༨༦ གི་ཐོག་ལུ་ ཐིམ་ཕུ་དབྱངས་ཅན་ཕུག་ སྒྲུབ་ཁང་ནང་སྦེ་ དགོངས་པ་ཆོས་དབྱིངས་ལུ་ཐིམས་པའི་ ཚུལ་སྟོན་གནང་ཡོདཔ་ཨིན་པས།

དེ་ཡང་ སློབ་པོན་ཞིང་གཤགས་མཆོག་ སྤྱི་ལོ་ ༡༩༣༩ ལུ་ ཐིམ་ཕུ་ཅང་དགེ་བསྙེན་ཁར་ སྐུ་འཁྲུངས་ཡོདཔ་ད་ དགུང་ལོ་ ༧ ལུ་ བྱམས་མགོན་ངག་དབང་འཕྲིན་ལས་ཀྱི་ཞབས་སར་ དཔལ་ལྡན་འབྲུག་པའི་འདུས་སྡེར་ འཛུལ་བཞུགས་མཛད་དེ་ གྲྭ་ཚང་གི་ ཆོས་སྤྱོད་སྒྲིག་ལམ་ཚུ་ལུ་ སྒོ་གསུམ་གུས་པའི་སྒོ་ལས་ དང་བླངས་མཛད་གནང་ནུག།

དགུང་ལོ་ ༡༧ ལས་ ༤༦  ཚུན་ སྐྱབས་རྗེ་ཞིང་གཤེགས་དམ་པ་ མཁས་དབང་དགེ་འདུན་རིན་ཆེན་མཆོག་གི་ ཕྱག་ཞུ་སྟེ་ སྤ་རོ་ཀུན་དགའ་གླིང་ཆོས་གླིང་དང་ ཐིམ་ཕུ་རྟ་མགོ་དང་ ཕ་ཇོ་སྡིངས་བཤད་གྲྭ་ཚུ་ནང་ སྐྱོར་དཔོན་མཛད་དེ་ བཞུགས་ཡོདཔ་ཨིན་པས།

དེ་ལས་ སྤྱི་ལོ་ ༡༩༨༥ དགུང་ལོ་ ༤༧ ལུ་ བདེ་ཆེན་ཕོ་བྲང་ དགེ་འདུན་སློབ་གྲྭའི་ དབུ་འཛིན་གྱི་ གོ་གནས་ཁར་ ལོ་ངོ་ ༡ གི་རིང་ བཞུགས་པའི་སྐབས་ལུ་ སློབ་གྲྭཔ་ཚུ་ལུ་ དཔལ་ལྡན་འབྲུག་པའི་རིང་ལུགས་ཀྱི་ སྒྲིག་ལམ་ཆོས་གསུམ་དང་ གར་ཐིག་དབྱངས་གསུམ་གྱི་ སློབ་སྟོན་མཛད་གནང་ནུག། 

དགུང་ལོ་ ༤༨ སྤྱི་ལོ་ ༡༩༨༦  ལུ་ དབང་འདུས་ཕོ་བྲང་རབ་སྡེའི་ བླམ་གནས་བརྟན་དང་ དགུང་ལོ་ ༥༣ ལུ་ གཞུང་གྲྭ་ཚང་ལྟེ་བའི་ མཚན་ཉིད་སློབ་དཔོན་གྱི་ གོ་གནས་བཞེས་ཡོདཔ་ད་ དགུང་ལོ་  ༦༡ ལུ་ དབྱངས་པའི་སློབ་དཔོན་གྱི་ གོ་གནས་བཞེས་ཡོདཔ་ཨིན་པས།

དགུང་ལོ་ ༦༨ ལུ་ གཞུང་གྲྭ་ཚང་ལས་ དགོངས་ཞུས་མཛད་དེ་ ད་ཚུན་གྱི་བར་ན་ ཐིམ་ཕུག་ཐ་བྲག་དགོན་པའི་ དབེན་གནས་ལུ་ དཔལ་ལྡན་འབྲུག་པའི་རྒྱལ་མཚན་ ནམ་མཁར་བསྒྲེངས་ཏེ་ བཞུགས་ཡོདཔ་སྦེ་ གཞུང་གྲྭ་ཚང་གི་ གཞུང་འབྲེལ་གདོང་དེབ་ནང་ བཀོད་འདུག་པའི་གནས་ཚུལ།