ཡུ་ཨེཛ་གི་ ཤར་ཕྱོགས་མཚོ་འགྲམ་བདའ་སྟེ་ རླུང་འཚུབ་ཨེ་རིན་གྱིས་ རྒྱ་མཚོ་རྦ་རླབས་འཁྲུག་སྟེ་ ཚེ་སྲོག་ལུ་ཉེན་ཁ།

བི་བི་སི།་

སྤྱི་ཟླ་ ༩ པའི་ཚེས་ ༡༩ ལུ་ རླུང་འཚུབ་ཨེ་རིན་ཟེར་མི་དེ་ ཉེན་ཁ་དབྱེ་རིམ་ ༤ པ་ལུ་ ཡར་སེང་སོང་ཡོད་མི་དེ་གིས་ ཡུ་ཨེཛ་ཤར་ཕྱོགས་ཀྱི་ མཚོ་འགྲམ་བདའ་སྟེ་ ཚེ་སྲོག་ལུ་ ཉེན་ཁ་ཆེ་བའི་ རྦ་རླབས་འཁྲུག་ནི་གི་ ཉེན་ཁ་ཡོདཔ་སྦེ་ དབང་འཛིན་ཚུ་གིས་ བཤད་ཡོདཔ་ཨིན་པས།

དེ་ཡང་ རླུང་འཚུབ་ལུ་བརྟེན་པའི་ ཆརཔ་རྐྱབ་ནི་དེ་གིས་ ཤར་ལྷོ་བཱ་ཧ་མཱཛ་དང་ ཊཱག་ དེ་ལས་ ཀའི་ཀོཛ་གླིང་ཕྲན་ཚུ་ནང་ ཆར་རླུང་གི་ ཉེན་ཁ་ཡོད་པའི་ ཉེན་བརྡ་ཚུ་ཡང་འབད་ནུག།

སྤྱི་ཟླ་ ༨ པའི་ཚེས་ ༡༨ ལུ་ ས་གནས་ཀྱི་ ཕྱི་རོའི་ཆུ་ཚོད་ ༨ དེ་ཅིག་ཁར་ བཱ་ཧ་མཱཛ་གླིང་ཕྲན་གྱི་ ཤར་ཁ་ཐུག་ལས་ ཆུ་ཚོད་རེ་ལུ་ རླུང་མ་ཤུགས་ཚད་ མ་ཡེལ་ ༡༣༠ དེ་ཅིག་ འཕུ་ཡི་ཟེར་ཨིན་པས།

བི་རི་ཊེན་གྱི་ ཁྱབ་ཁོངས་འོག་ལུ་ཨིན་མི་ ཊཱག་དང་ ཀའི་ཀོཛ་གི་ གླིང་ཕྲན་སྦོམ་ཚུ་ནང་ དབང་འཛིན་ཚུ་གིས་ མི་མང་ཞབས་ཏོག་ཚུ་ མཚམས་འཇོག་འབད་ཡོདཔ་མ་ཚད་ ཉེན་ཁ་མེད་པའི་ ས་གོ་ཚུ་ནང་ སྤོ་བཤུད་འབད་དགོཔ་རེ་ འཐོན་པ་ཅིན་ གྲ་སྒྲིག་གི་དོན་ལས་ ཅ་ཆས་ཚུ་ཡང་ བསྡམ་དགོ་པའི་ བཀོད་རྒྱ་གནང་ནུག།

དེ་ཚེ་ སྤྱི་ཟླ ༨ པའི་ཚེས་ ༡༧ ལུ་ རླུང་མ་ཤུགས་སྦེ་ འཕུ་མི་ལུ་བརྟེན་ཏེ་ མི་གྲངས་ ༡༥༠,༠༠༠ ལྷགཔ་ཅིག་ གློག་མེ་མེད་པར་ ལུས་ཡོད་རུང་ གློ་བུར་གྱི་ ཉམས་བཅོས་ཚུ་འབད་དེ་ དེ་ཚེ་ཕྱི་རུ་ར་ བརྒྱ་ཆ་ ༩༥ དེ་ཅིག་ལུ་ གློག་མེ་བཀྲམ་སྤེལ་ འབད་ཚུགས་ཡོདཔ་ཨིན་པས།

མ་གཞི་ རླུང་འཚུབ་དེ་གིས་ ཐད་ཀར་དུ་ གླིང་ཕྲན་ཚུ་ནང་ གནོད་སྐྱོན་རྐྱབ་མི་ཚུགས་ནི་ཨིན་རུང་ རྒྱལ་ཁབ་ཀྱི་ རྐྱེན་ངན་ཉེན་སྲུང་འཛིན་སྐྱོང་གིས་ མི་སེར་ཚུ་ལུ་ གྲ་སྒྲིག་སྦེ་ སྡོདདགོ་པའི་ ནན་སྐུལ་འབད་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།