ཨིན་ཌོ་ནེ་ཤི་ཡ་ལུ་ སློབ་གྲྭའི་སྒྲིང་ཁྱིམ་ཅིག་ རམ་འགྱོ་མིའི་ནང་ ཤི་རྐྱེན་གྱི་གྱངས་ཁ་ ༥༤ ལུ་ཡང་སེང་།

བི་བི་སི།

སྤྱི་ཟླ་ ༡༠ པའི་ཚེས་ ༦ ལུ་ ཨིན་ཌོ་ནེ་ཤི་ཡའི་ དབང་འཛིན་ཚུ་གིས་ བཤད་དོ་བཟུམ་འབད་བ་ཅིན་ ཨིན་ཌོ་ནེ་ཤི་ཡ་ལུ་ སློབ་གྲྭ་ཅིག་གི་ སྒྲིང་ཁྱིམ་རམ་འགྱོ་མི་ལུ་བརྟེན་ཏེ་ ཤི་རྐྱེན་གྱི་གྱངས་ཁ་དེ་ མི་གྲངས་ ༥༤ ལུ་ ཡར་སེང་སོང་ཡོདཔ་མ་ཚད་ ད་རུང་ཡང་ ལེ་ཤ་ཅིག་ར་ མ་ཚང་པར་ཡོདཔ་ལས་ སྲོག་སྐྱབས་འབད་མི་ཚུ་གིས་ འཕྲོ་མཐུད་དེ་ར་ འཚོལ་ཞིབ་འབད་དོ་ཟེར་ཨིན་པས།

དེ་ཡང་ སྤྱི་ཟླ་ ༩ པའི་ཚེས་ ༢༩ ལུ་ ཤར་ཕྱོགས་ཇ་བ་ལུ་ཡོད་མི་ ཨཱལ་ཁོ་ཟི་ནི་ ཨིཛ་ལཱ་མིག་ ལྟོ་ཐོབ་སློབ་གྲྭའི་ནང་ སློབ་ཕྲུག་བརྒྱ་ལས་བཅད་དེ་ ཁ་ཐུན་བཏང་སྡོད་པའི་བར་ན་ བཟོ་བསྐྲུན་འབད་བའི་བསྒང་ཡོད་མི་ སློབ་གྲྭའི་སྒྲིང་ཁྱིམ་དེ་ རམ་སོང་ཡོདཔ་སྦེ་བཀོད་ནུག།

ཨིན་ཌོ་ནེ་ཤི་ཡའི་ རྐྱེན་ངན་འཛིན་སྐྱོང་ལས་སྡེ་གིས་ དུས་ཅི་ རྒྱལ་ཁབ་ནང་ དེ་བཟུམ་མའི་ རྐྱེན་ངན་བྱུང་མི་དེ་ མཐོ་ཤོས་ཅིག་ཨིན་ཟེར་ བཤད་ཡོདཔ་ཨིན་པས།

ཞིབ་དཔྱོདཔ་ཚུ་གིས་ ད་ལྟོའི་བར་ན་ཡང་ སློབ་གྲྭའི་སྒྲིང་ཁྱིམ་དེ་ རམ་འགྱོ་བའི་ རྒྱུ་རྐྱེན་ཚུ་ བལྟ་དོ་ཡོདཔ་ད་ འགོ་དཔོན་ལ་ལུ་ཅིག་གིས་ ཐོག་ཚད་ ༢ འབད་མི་ སྒྲིང་ཁྱིམ་དེ་ གཞི་འགྱམ་སྒྲིང་སྒྲིང་མེད་པའི་སྐོར་ལས་ བཤད་ཡོདཔ་སྦེ་བཀོད་ནུག།

སློབ་གྲྭ་ཨཱལ་ཁོ་ཟི་ནི་ ཨིཛ་ལཱ་མིག་ཟེར་མི་དེ་ ཨིན་ཌོ་ནེ་ཤི་ཡ་ལུ་ རང་ལུགས་ཨིཛ་ལཱ་མིག་གི་ ནང་སྡོད་སློབ་གྲྭ་ཅིག་ཨིན་པས་ཟེར་ བཀོད་འདུག་པའི་གནས་ཚུལ།