སྟོན་པའི་རིང་བསྲེལ་བྱིན་ཅན་ཚུ་ ལོག་སྟེ་ར་ རྒྱ་གར་ལུ་ གདན་འདྲེན་ཞུ་ཡོདཔ།

མགོན་པོ་རྡོ་རྗེ།

རྒྱ་གར་འཕགས་པའི་ཡུལ་ལས་ འབྲུག་ལུ་ གདན་འདྲེན་ཞུ་ཡོད་མི་ སྟོན་པའི་རིང་བསྲེལ་བྱིན་ཅན་ཚུ་ མི་སེར་དད་ལྡན་ཡོངས་ལུ་ མཇལ་ཁ་གནང་པའི་ཤུལ་ལས་ རང་ཟླ་ ༡༠ པའི་ཚེས་ ༥ སྤྱི་ཟླ་ ༡༡ པའི་ཚེས་ ༢༥ གི་དྲོ་པ་ རྒྱ་གར་རྒྱལ་ཁབ་ནང་ ལོག་སྟེ་ར་ གདན་འདྲེན་ཞུ་ནུག།

དེ་ཡང་ འབྲུག་བརྒྱུད་འཛིན་གྱི་ མི་དབང་རྒྱལ་རབས་བཞི་པ་ དཔལ་འཇིགས་མེད་སེངྒེ་དབང་ཕྱུག་མཆོག་ དགུང་ལོ་ ༧༠ བཞེས་པའི་ འཁྲུངས་སྐར་དུས་ཆེན་ བརྩི་སྲུང་དང་འབྲེལ་ཏེ་ རྒྱལ་འཛམ་གླིང་ཞི་བདེའི་ སྨོན་ལམ་ཆེན་མོའི་ མཛད་རིམ་གྱི་དོན་ལས་ སྤྱི་ཟླ་ ༡༡ པའི་ཚེས་ ༨ ལུ་ གདན་འདྲེན་ཞུ་ཡོདཔ་ཨིན་པས།

དེ་བཟུམ་མའི་ བདག་ཅག་གི་སྟོན་པ་ སངས་རྒྱས་བཅོམ་ལྡན་འདས་ཀྱི་ རིང་བསྲེལ་བྱིན་ཅན་ཚུ་ རྒྱལ་ཁབ་ནང་ གདན་འདྲེན་ཞུ་སྟེ་ ཐིམ་ཕུ་བཀྲ་ཤིས་ཆོས་རྫོང་གི་ ཀུན་ར་ནང་སྦེ་ ད་ཚུན་གྱི་བར་ན་ དད་ལྡན་མི་སེར་ཡོངས་ལུ་ མཇལ་ཁ་གནང་སྟེ་ བཞུགས་སུ་གསོལ་ཡོད་པའི་གནས་ཚུལ།