རྒྱལ་ཁབ་ནང་ རླུང་མ་ཤུགས་ཅན་སྦེ་ འཕུ་ནི་བཟུམ་ཅིག་ཡོད་པའི་སྔོན་བཤད།

པདྨ་དབང་འདུས།

སྤྱི་ཟླ་ ༡༢ པའི་ཚེས་ ༡ ལུ་ རྒྱལ་ཡོངས་ཆུ་དཔྱད་དང་ གནམ་གཤིས་རིག་པའི་ལྟེ་བ་ལས་ གས་བསྒྲགས་ཅིག་ནང་ བཀོད་དོ་བཟུམ་འབད་བ་ཅིན་ མ་འོངས་པའི་ ཉིནམ་ཚུ་ནང་ འཛམ་གླིང་ནུབ་ཕྱོགས་ཀྱི་ གནམ་གཤིས་ཀྱི་ དཀའ་ངལ་དང་ འཛམ་གླིང་ནུབ་ཕྱོགས་ལས་ ཤར་ཕྱོགས་ཁ་ཐུག་འཕུ་མི་ འཛམ་གླིང་བསྐོར་བའི་ རླུང་མའི་འཕུ་ཤུགས་ ཡར་སེང་གིས  འབྲུག་གི་ལུང་ཕྱོགས་ལུ་ ཤན་ཞུགས་ནི་མས་ཟེར་ཨིན་པས།

དེ་ཡང་ སྤྱི་ཟླ་ ༡༢ པའི་ཚེས་ ༢ དང་ ༣ ལུ་ འབྲུག་བྱང་ཕྱོགས་དང་ ནུབ་ཕྱོགས་ དབུས་ཕྱོགས་ ཤར་ཕྱོགས་ཚུ་ནང་ རླུང་མ་ཤུགས་ཅན་སྦེ་ འཕུ་ནི་བཟུམ་ཅིག་ཡོདཔ་སྦེ་ སྔོན་བཤད་འབད་ཡོདཔ་ད་ གནད་དོན་དེ་གི་ཐེད་ཁར་ ལྟ་རྟོག་ཚུ་འབད་བཞིན་དུ་ཡོདཔ་ལས་ སྔོན་བཤད་དེ་ལུ་ འགྱུར་བ་སྦོམ་སྦེ་ར་ འཐོན་པ་ཅིན་ དུས་མཐུན་གྱི་ སྙན་ཞུ་ཚུ་ འབད་འོང་ཟེར་བཀོད་ནུག།

རྒྱལ་ཡོངས་ཆུ་དཔྱད་དང་ གནམ་གཤིས་རིག་པའི་ལྟེ་བ་གིས་ བཤད་མིའི་ནང་ ནུབ་ཕྱོགས་ཀྱི་ གནམ་གཤིས་ཀྱི་ དཀའ་ངལ་ཟེར་མི་དེ་ མེ་ཌི་ཊེ་རི་ནི་ཡཱན་ཟེར་མི་ ལུང་ཕྱོགས་ནང་ལས་ལངས་མི་ ཆུ་རླུང་གི་ འཚུབ་ཆ་ལུ་བརྟེན་ཏེ་ རྒྱ་གར་ནུབ་བྱང་གི་ ལུང་ཕྱོགས་ནང་ གནམ་དགུན་ཆརཔ་རྐྱབ་དོ་ཡོདཔ་ད་ དེ་ཚུ་ལུ་ ནུབ་ཕྱོགས་ཀྱི་ རླུང་མ་གིས་ ཤན་ཞུགས་འབད་དེ་ ཧང་སྟོང་མར་ དྲོད་ཚད་མར་འབབ་ནི་དང་ ཆརཔ་རྐྱབ་ནི་ཚུ་གི་ གནས་སྟངས་བྱུང་དོ་ཡོདཔ་ཨིན་པས།

འབྲུག་ལུ་ དེ་བཟུམ་མའི་ རླུང་མ་ཤུགས་སྦེ་ འཕུ་སྲིད་པའི་ ས་ཁོངས་ཚུ་ཡང་ བྱང་ཕྱོགས་ལུ་ དགའ་ས་དང་ ལ་ཡ། ནུབ་ཕྱོགས་ལུ་ ཐིམ་ཕུ་དང་ ཧཱ་ སྤ་རོ་ དབང་འདུས་ཕོ་བྲང་ སྤུ་ན་ཁ་ ཕོབ་སྦྱིས་ཁ། དེ་ལས་ དབུས་ཕྱོགས་ལུ་ བུམ་ཐང་དང་ ཀྲོང་གསར་ དར་དཀར་ན་ གཞལམ་སྒང་ རྩི་རང་ གླང་མཐིལ། ཤར་ཕྱོགས་ལུ་ མོང་སྒར་དང་ བཀྲིས་གཡང་རྩེ་ བཀང་ལུང་ ལྷུན་རྩེ། ལྷོ་ཕྱོགས་ལུ་ བསམ་རྩེ་དང་ ཕུན་ཚོགས་གླིང་ དགེ་ལེགས་ཕུག་ པདྨ་དགའ་ཚལ་དང་ བདེ་བའི་ཐང་ཚུ་ ཚུད་དོ་ཡོདཔ་ཨིན་པའི་གནས་ཚུལ།