མི་དབང་མངའ་ཞབས་མཆོག་གིས་ དགེ་ལེགས་ཕུག་ལུ་ དཔལ་སྲུང་སྡེ་ཚན་ ༣ པའི་ སྦྱོང་བརྡར་བ་ཚུ་དང་མཇལ་ཕྲད།

མི་དབང་མངའ་བདག་རིན་པོ་ཆེ་མཆོག་ འབྲུག་ཤར་ཕྱོགས་དང་ ལྷོ་ཕྱོགས་ལུ་ ཆིབས་བསྐྱོད་གནང་ཐོག་ལས་ སྤྱི་ཟླ་ ༥ པའི་ཚེས་ ༢༥ ལུ་ མི་དབང་མངའ་བདག་རིན་པོ་ཆེ་མཆོག་གིས་ བསམ་གྲུབ་ལྗོངས་མཁར་ པདྨའི་ཐང་གི་ རྒྱལ་སྲུང་སྦྱོང་བརྡར་སྤེལ་ཁང་ནང་ སྤྱི་ལོ་ ༢༠༢༦ ལོའི་ རྒྱལ་སྲུང་སྡེ་ཚན་ ༡ པའི་ སྦྱོང་བརྡར་བ་ཚུ་དང་ མཇལ་ཕྲད་མཛད་གནང་ཡོདཔ་མ་ཚད་ བཟོ་སྐྲུན་འབད་བའི་བསྒང་ཡོད་མི་ སྦྱོང་བརྡར་སྤེལ་ཁང་གི་ ས་ཁོངས་ནང་ཡང་ གཟིགས་ཞིབ་གནང་ཡོདཔ་ཨིན་པས།

དེ་བཟུམ་སྦེ་ དགེ་ལེགས་ཕུག་ལུ་ དཔལ་སྲུང་སྡེ་ཚན་ ༣ པའི་ སྦྱོང་བརྡར་བ་ཚུ་དང་ཡང་ མཇལ་ཕྲད་མཛད་གནང་ཡོདཔ་ད་ ད་རེས་ དཔལ་སྲུང་སྡེ་ཚན་ཁག་ ༣ གྱི་ནང་ གྲལ་གཏོགས་འབད་མི་ ༩༨༡ ཡོདཔ་ཨིན་པས།

དེ་མ་ཚད་ མི་དབང་མཆོག་གིས་ དགེ་ལེགས་ཕུག་ལུ་ བྱོན་པའི་ལམ་ཁར་ མཆོད་རྟེན་ ༡༠༨ ཀྱི་ ལས་འགུལ་སྡེ་ཚན་དང་ རྩི་རང་རྫོང་ཁག་གི་ འགོ་དཔོན་ཚུ་དང་ཡང་ མཇལ་ཕྲད་མཛད་གནང་ཡོད་པའི་ གནས་ཚུལ་མདོར་བསྡུས།