སྐྱབས་རྗེ་ཆེ་མཆོག་གིས་ ཐིམ་ཕུ་བཀྲ་ཤིས་རྫོང་གི་ མ་ཆེན་གཟིམ་དཔོན་ བསྐོ་བཞག་ཐོག་ལུ་ བཀྲ་ཤིས་ལེགས་དར།

རང་ཟླ་ ༥ པའི་ཚེས་ ༦ སྤྱི་ཟླ་ ༦ པའི་ཚེས་ ༢༠ ལུ་ སྐྱབས་རྗེ་རྗེ་མཁན་རིན་པོ་ཆེ་མཆོག་གིས་ ཐིམ་ཕུག་ཀུན་གསལ་ཕོ་བྲང་ལུ་སྦེ་ མཚམས་པ་ཐོས་པ་ལུ་ ཐིམ་ཕུ་བཀྲིས་རྫོང་གི་ མ་ཆེན་གཟིམ་དཔོན་སྦེ་ བསྐོ་བཞག་ཐོག་ལུ་ བཀྲིས་ལེགས་དར་གནང་ཡི།
དེ་ཡང་ དབང་འདུས་རྫོང་ཁག་ རུས་པ་བྲག་ཕུག་ལས་ དགུང་ལོ་ ༥༢ བཞེས་མི་ མཚམས་པ་ཐོས་པ་གིས་ སྐུ་ན་ཆུང་ཀུ་ལས་ར་ གཞུང་གྲྭ་ཚང་ནང་ འཛུལ་ཞུགས་མཛད་དེ་ སློབ་སྦྱོང་གི་རིམ་པ་ཚུ་ བདེ་ཆེན་ཕོ་བྲང་སློབ་གྲྭ་ལས་ འགོ་བཙུགས་ནུག།
དེ་ལས་ མདོ་སྡེ་བྲག་བཤད་གྲྭ་དང་ རྟ་མགོ་མཐོ་རིམ་བཤད་གྲྭ་ཚུ་ལས་ གཞུང་རིག་གནས་ཀྱི་ སློབ་སྦྱོང་ཚུ་ མཐར་ཕྱིན་ཏེ་ སྐྱབས་རྗེ་ཞིང་གཤེགས་དམ་པ་ རྗེ་བཙུན་བསྟན་འཛིན་དོན་གྲུབ་མཆོག་དང་ རྗེ་མཁན་ཁྲི་རབས་ ༧༠ པ་ སྐྱབས་རྗེ་འཇིགས་མེད་ཆོས་གྲགས་ རྡོར་སློབ་བསོད་ནམས་རྒྱ་མཚོ་ཚུ་གི་ཞབས་ས་ལས་ ཕྱག་ཆེན་ཆོས་དྲུག་ལ་སོགས་པའི་ གདམས་ངག་ཡོངས་རྫོགས་ཞུ་སྟེ་ སྤྱི་གཞི་དགོན་པའི་ སྒྲུབ་སྡེ་དང་ ཤར་བདེ་ཆེན་ཆོས་གླིང་གི་ སྒྲུབ་སྡེའི་ནང་ ལོ་གསུམ་ཕྱོགས་གསུམ་ལན་ཐེངས་ ༣ གནང་ཡོདཔ་ཨིན་པས།
དེ་གི་ཤུལ་ལས་ སྤྱི་གཞི་དགོན་པ་གསར་པའི་ སྒྲུབ་སྡེ་སློབ་དཔོན་སྦེ་ ཕྱག་ཞུ་ཡོདཔ་ད་ ད་རེས་ཀྱི་ གོ་གནས་འདི་ མ་བཞེས་པའི་ཧེ་མ་ སྤ་རོ་ཀུན་དགའ་ཆོས་གླིང་གི་ སྒྲུབ་སྡེ་ནང་ སྐུ་མཚམས་ལུ་ བཞུགས་ཡོདཔ་ཨིན་པའི་གནས་ཚུལ།

Please follow and like us: