མི་དབང་རྒྱལ་ཡུམ་སྐུ་བགྲེས་མཆོག་གིས་ བྱང་ཆུབ་མཆོད་རྟེན་ ༡༠༨ བཞེངས་གནང་ནིའི་དོན་ལུ་ བསྔོ་སྨོན་གནང་ཡོདཔ།

པདྨ་དབང་འདུས།

སྤྱི་ཟླ་ ༦ པའི་ཚེས་ ༢༤ ལུ་ མི་དབང་རྒྱལ་ཡུམ་སྐུ་བགྲེས་ སྐལ་བཟང་ཆོས་སྒྲོན་དབང་ཕྱུག་མཆོག་གིས་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ བྱང་ཆུབ་མཆོད་རྟེན་ ༡༠༨ བཞེངས་གནང་ནིའི་ནང་ མི་དབང་མངའ་བདག་རིན་པོ་ཆེ་མཆོག་གིས་ སྐུ་སྒེར་གྱི་ མཐའ་དོན་ལུ་ མ་གཟིགས་པར་ དགེ་ལེགས་ཕུག་ དྲན་ཤེས་ཁྲམ་ཚོགས་ཀྱི་དོན་ལུ་ ཐུགས་བརྩོན་ཐོག་ལས་ ཕུགས་གཟིགས་ཅན་གྱི་ ཕྱག་ལཱ་བཟང་པོ་གནང་མི་ལུ་ གུས་བཏུད་ཀྱི་དོན་ལས་ བྱིན་ལྡན་མཆོད་རྟེན་ཅིག་ལུ་ བསྔོ་སྨོན་གནང་ནུག།  

དེ་མ་ཚད་ མཆོད་རྟེན་དེ་ གོང་ས་ཨྱོན་དབང་ཕྱུག་མཆོག་ལས་ དབུ་བཟུང་སྟེ་ མི་དབང་རྒྱལ་ཡུམ་སྐུ་བགྲེས་མཆོག་གི་རྒྱལ་སྲས་ མི་དབང་འབྲུག་རྒྱལ་བཞི་པ་ འཇིགས་མེད་སེངྒེ་དབང་ཕྱུག་མཆོག་དང་ སྐུ་ཚ་བོ་མི་དབང་མངའ་བདག་རིན་པོ་ཆེ་ འཇིགས་མེད་གེ་སར་རྣམ་རྒྱལ་དབང་ཕྱུག་མཆོག་ཚུན་གྱིས་ སྐུ་སྒེར་གྱི་ མཐའ་དོན་ལུ་ མ་གཟིགས་པར་ བསྒྲུབས་གནང་ཡོད་པའི་ འབྲུག་རྒྱལ་བརྒྱུད་རིང་ལུགས་ཀྱི་ ནོར་སྐལ་བཟང་པོའི་ ཤུལ་བཞག་ལུ་ གུས་ཞབས་གཏིང་ཟབ་ཀྱི་དོན་ལུ་ བསྔོ་སྨོན་གནང་ཡོདཔ་ཨིན་པས། 

དེ་བཟུམ་སྦེ་ མི་དབང་རྒྱལ་ཡུམ་སྐུ་བགྲེས་མཆོག་གིས་ མཆོད་རྟེན་དེ་ རྒྱལ་ཡུམ་སྐུ་བགྲེས་རང་གི་ ཡབ་མེས་གོང་གཟིམ་ཨྱོན་རྡོ་རྗེ་དང་ ཡབ་ཡུམ་ གོང་གཟིམ་བསོད་ནམས་སྟོབས་རྒྱས་རྡོ་རྗེ་དང་ མ་ཡུམ་ཆོས་དབྱིངས་དབང་མོ་རྡོ་རྗེ་བཅས་ཀྱི་ ཐུགས་ལས་ཡོལ་བར་ཕངས་པའི་ རྗེས་དྲན་ལུ་ཡང་ བསྔོ་སྔོན་གནང་ཡོད་པའི་གནས་ཚུལ།