ཚོད་དཔག་ཅན་གྱི་ ཆར་རླུང་ཚབས་ཆེན་ ཨེལ་ནི་ནོ་ཟེར་མིའི་ གདོང་ལན་ལུ་ གྲ་སྒྲིག་ཞལ་འཛོམས།

པདྨ་དབང་འདུས།

སྤྱི་ཟླ་ ༧ པའི་ཚེས་ ༡༠ ལུ་ མི་རྗེ་བློན་ཆེན་མཆོག་ དབུ་བཞུགས་ཐོག་ལས་ རྒྱ་ཡོངས་ཆེ་རིམ་ཚོགས་ཆུང་གིས་ ཚོད་དཔག་ཅན་གྱི་ ཆར་རླུང་ཚབས་ཆེན་ ཨེལ་ནི་ནོ་ཟེར་མི་གིས་ གནོད་སྐྱོན་འབྱུང་སྲིད་ནི་ཨིན་པའི་ གདོང་ལན་ལུ་ འབྲུག་གི་གྲ་སྒྲིག་བསྐྱར་ཞིབ་ཀྱི་ ཞལ་འཛོམས་ཐེངས ༢ པ་ ཚོགས་གནང་ནུག། 

ཚོགས་ཆུང་དེ་གིས་ སོ་ནམ་དང་ འཐུང་ཆུའི་ཐོན་ཁུངས་ ཉེར་མཁོའི་ཅ་ཆས་མཛོད་ཁང་ བཟའ་ཚང་གི་ འཐུང་ཆུ་ཉེན་སྲུང་ ནགས་ཚལ་མེ་རྐྱེན་ ཁྱེགས་མཚོ་ལུ་བརྟེན་པའི་ ཉེན་ཁ་མར་ཕབ་ ཁྱེགས་མཚོ་རྦེད་པའི་ རྐྱེན་ངན་གྱི་ ཉེན་ཁ་དང་འབྲེལ་ཏེ་ སྤུ་ན་ཁ་རྫོང་ སྟོངམ་བཏོན་ནིའི་སྦྱོང་བརྡར་ དེ་ལས་ རྒྱལ་ཡོངས་ཀྱི་ ཡུན་ཐུབ་བཙན་ཐབས་ལུ་ ནུས་ཤུགས་ཀྱི་ ཐབས་ལམ་གཞན་ཚུ་དང་འབྲེལ་ཏེ་ རྒྱལ་ཡོངས་ཀྱི་ གྲ་སྒྲིག་ཐབས་ལམ་ཚུ་ བསྐྱར་ཞིབ་གནང་ཡོདཔ་ཨིན་པས།  

དེ་ཡང་ འབྲུག་གཞུང་གི་ ཁ་ཐུག་ལས་ ཐོན་རིམ་ཅན་གྱི་ གནམ་གཤིས་ཀྱི་ ཉེན་ཁ་ཚུ་ལུ་བརྟེན་པའི་ ཚེ་སྲོག་དང་ འཚོ་རྟེན་ དེ་ལས་ གནད་འགག་ཅན་གྱི་ གཞི་རྟེན་མཁོ་ཆས་ཚུ་ལུ་ སྔ་གོང་གྲ་སྒྲིག་དང་ མཉམ་འབྲེལ་ཐོག་ལས་ གནོད་སྐྱོན་ཉེན་སྲུང་འབད་ནི་ལུ་ ཁས་ལེན་ཡོདཔ་ཨིན་པའི་གནས་ཚུལ།