ར་ཤི་ཡ་གིས་ ཡུ་ཀེ་རེན་གྱི་རྒྱལ་ས་ ཀི་ཡིབ་ལུ་ གནོད་འཚུབ་བཀལ་ཡོདཔ།

རོའི་ཊརཛ།

སྤྱི་ཟླ་ ༧ པའི་ཚེས་ ༡༤ ལུ་ ར་ཤི་ཡ་གིས་ ཡུ་ཀེ་རེན་གྱི་རྒྱལ་ས་ ཀི་ཡིབ་ལུ་ མཁའ་དམག་འཕྲུལ་ཆས་ ཌཱོན་ཚུ་དང་ མི་ཛ་ཡེལ་ཚུ་ གཅིག་ཤུལ་གཉིས་ཤུལ་སྦེ་ བཏང་ཐོག་ལས་ གནོད་འཚུབ་བཀལ་མི་དེ་ སྤྱི་ཟླ་འདི་ནང་ ཐེངས་ ༥ པ་ཨིན་པས།

དེ་ཡང་ རྒྱལ་ས་ཀི་ཡིབ་ལུ་ སློབ་གྲྭ་དང་ ཚོང་འབྲེལ་རྩིས་ཏེ་ ས་ཁོངས་ཁག་ ༡༦ དེ་ཅིག་ལུ་ གནོད་སྐྱོན་བྱུང་ཡོདཔ་སྦེ་ ཡུ་ཀེ་རེན་གྱི་སྲིད་འཛིན་ ཝོ་ལོ་ཌི་མིར་ ཟེ་ལེནཛ་ཀི་གིས་ གསུངས་ཡོདཔ་མ་ཚད་ ཁྲོམ་སྡེའི་འགོ་དཔོན་ཚུ་གིས་ཡང་ ཁྲོམ་སྡེ་ནང་འཁོད་ལུ་ མེ་རྐྱེན་ལེ་ཤ་ཅིག་ བྱུང་ཡོད་པའི་ སྙན་ཞུ་འབད་ནུག།

གནོད་འཚུབ་དེ་གིས་ ཡུ་ཀེ་རེན་གྱི་ ཁར་ཀིབ་ལུང་ཕྱོགས་ནང་ མི་གྲངས་ ༧ དང་ ཅེར་ནི་ཧིབ་ལུང་ཕྱོགས་ནང་ མི་གྲངས་ ༣ ལུ་ རྨ་སྐྱོན་བྱུང་ཡོདཔ་སྦེ་ཡང་ སྲིད་འཛིན་ཟེ་ལེནཛ་ཀི་གིས་ གསུངས་ཡོདཔ་ཨིན་པས།

དེ་མ་ཚད་ སྤྱི་ཟླ་ ༧ པའི་ཚེས་ ༡༣ གྱི་ཕྱི་རོ་ཡང་ ར་ཤི་ཡ་གིས་ མཁའ་དམག་འཕྲུལ་ཆས་ ཌཱོན་ ༡༣༥ དང་ མི་ཛ་ཡེལ་མ་འདྲཝ་ ༡༠ བཏང་ཡོད་མིའི་གྲས་ལས་ མང་ཤོས་ཅིག་ར་ ཁྲོམ་ཚོགས་དང་ མི་སྡེ་ཚུ་ལུ་ བཏངཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།