འབྲུག་སླར་བྱུང་གློག་མེ་ལས་འཛིན་དང་ ཀོ་རི་ཡ་ཆུའི་ཐོན་ཁུངས་ལས་འཛིན་ ཀེ་ཝ་ཊར་གཉིས་ཀྱི་བར་ན་ སླར་བྱུང་ནུས་ཤུགས་གོང་འཕེལ མདུན་བསྐྱོད་ཀྱི་ གོ་དོན་ཆིངས་ཡིག།

སྤྱི་ཟླ་ ༧ པའི་ཚེས་ ༡༦ ལུ་ འབྲུག་སླར་བྱུང་གློག་མེ་ལས་འཛིན་དང་ ཀོ་རི་ཡ་ ཆུའི་ཐོན་ཁུངས་ལས་འཛིན་ ཀེ་ཝ་ཊར་ ༢ ཀྱི་བར་ན་ ཐིམ་ཕུ་འབྲུག་སླར་བྱུང་གློག་མེ་ལས་འཛིན་གྱི་ ཡིག་ཚང་ནང་སྦེ་ འབྲུག་ལུ་ ཆུར་བརྟེན་གློག་མེ་དང་ ཉིན་དྲོད་ནུས་ཤུགས་ལས་འགུལ་ཚུ་ གོང་འཕེལ་གཏང་ནི་དང་ བཙོག་རླུང་མར་ཕབ་དང་ གཙང་དག་ནུས་ཤུགས་ཀྱི་ ཐབས་ལམ་ཚུ་ནང་  མཉམ་འབྲེལ་བཙན་ཐབས་འབད་ནིའི་དོན་ལས་ གོ་དོན་ཆིངས་ཡིག་ཅིག་གུ་ མིང་རྟགས་བཀོད་ནུག།

གོ་དོན་ཆིངས་ཡིག་དེ་གིས་ གཅིག་མཚུངས་མཐའ་དོན་དང་ ཁྱད་རིག་ཅན་གྱི་ གནད་དོན་ཚུ་ནང་ ཁྱབ་ཆེ་བའི་ མཉམ་འབྲེལ་གྱི་ སྒྲིག་བཀོད་ཅིག་ གཞི་བཙུགས་འབདཝ་ཨིན་པས། 

ལས་འཛིན་ ༢ ཀྱི་ མཉམ་འབྲེལ་དེ་གིས་ འབྲུག་གི་ཡུན་བརྟན་དཔལ་འབྱོར་གོང་འཕེལ་ལུ་ ཁེ་ཕན་ཡོད་པའི་ སླར་བྱུང་ནུས་ཤུགས་མདུན་བསྐྱོད་དང་ གནམ་གཤིས་བདེ་སྒྲིག་ལུ་རྒྱབ་སྐྱོར་ དེ་ལས་ དུས་རིང་ཁྱད་རིག་གི་ མཉམ་འབྲེལ་ཚུ་ལུ་ ཁས་ལེན་ཡོད་པའི་ བརྡ་མཚོན་དོ་ཡོདཔ་སྦེ་བཀོད་ནུག།