མི་དབང་མངའ་བདག་རིན་པོ་ཆེ་མཆོག་གིས་ དབུ་གཙོས་པའི་ མི་དབང་སྐུ་འཁོར་ལྷན་རྒྱས་ཀྱིས་ དགེ་ལེགས་ཕུག་ལུ་གཟིགས་སྐོར།

སྤྱི་ཟླ་ ༧ པའི་ཚེས་ ༢༥ ལུ་ མི་དབང་མངའ་བདག་རིན་པོ་ཆེ་མཆོག་གིས་ དབུ་གཙོས་པའི་ མི་དབང་རྒྱལ་བཙུན་མཆོག་དང་ མི་དབང་རྒྱལ་སྲས་ འཇིགས་མེད་རྣམ་རྒྱལ་དབང་ཕྱུག་ མི་དབང་རྒྱལ་སྲས་ ཨྱོན་དབང་ཕྱུག་ མི་དབང་རྒྱལ་སྲསམོ་ བསོད་ནམས་གཡང་སྒྲོན་དབང་ཕྱུག་ཚུ་ དགེ་ལེགས་ཕུག་ལུ་ གཟིགས་སྐོར་གྱི་དོན་ལས་ ཆིབས་བསྐྱོད་གནང་ཡོདཔ་ཨིན་པས།

དེ་ཚེ་ མི་དབང་སྐུ་འཁོར་ལྷན་རྒྱས་ཚུ་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ བཞེངས་གནང་ནི་ཨིན་མི་ བྱང་ཆུབ་མཆོད་རྟེན་ ༡༠༨ ཀྱི་ གཟུངས་ཞུགས་ཚུ་ གསར་སྤང་རྫོང་ནང་སྦེ་ གྲ་སྒྲིག་གནང་སར་ ཐུགས་སྨོན་གནང་པར་ བྱོན་ཡོདཔ་བཞིན་དུ་ གཞུང་གྲྭ་ཚང་གི་ ལས་ཚོགས་སློབ་དཔོན་མཆོག་གིས་ གཟུངས་ཞུགས་ཀྱི་ བྱིན་ལྡན་ཅ་དངོས་ཚུ་ མི་དབང་སྐུ་འཁོར་ལྷན་རྒྱས་ལུ་ སྤྱན་འབུལ་ཞུ་ནུག།

དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ ཉིན་གཅིག་ལུ་ བྱང་ཆུབ་མཆོད་རྟེན་ ༡༠༨ བཞེངས་ནི་ཨིན་མི་ ལས་འགུལ་དེ་ སྤྱི་ལོ་ ༢༠༢༦ སྤྱི་ཟླ་ ༡༡ པའི་ཚེས་ ༡ ལུ་ ཁས་བླངས་པ་ ༤༠,༠༠༠ དེ་ཅིག་གིས་ གྲལ་གཏོགས་འབད་དེ་ འགོ་འདྲེན་འཐབ་ནི་ཨིན་པས།

དེ་བཟུམ་མའི་ རེ་འདུན་མཐོ་བའི་ དམིགས་བསལ་གྱི་ ལས་འགུལ་དེ་གིས་ འབྲུག་མི་ཚུ་གི་ གཅིག་སྒྲིལ་དང་ ལྕོགས་གྲུབ་ཀྱི་ བརྡ་མཚོན་སྟོན་པའི་ཁར་ དགེ་ལེགས་ཕུག་ དྲན་ཤེས་ཁྲོམ་ཚོགས་དེ་ བྱིན་རླབས་ཅན་གྱི་ ས་ཁོངས་ཅིག་ལུ་ འགྱུར་ནི་ཨིནམ་སྦེ་ གནས་ཚུལ་གསལ་བཏོན་ནང་བཀོད་ནུག།

མི་དབང་སྐུ་འཁོར་ལྷན་རྒྱས་ དགེ་ལེགས་ཕུག་ལུ་ བཞུགས་པའི་རིང་གར་ དགེ་ལེགས་ཕུག་ དྲན་ཤེས་ཁྲོམ་ཚོགས་ཀྱི་ ལས་འགུལ་མ་འདྲཝ་ཚུ་ནང་ ལཱ་འབད་མི་ཚུ་དང་ དགེ་ལེགས་ཕུག་གི་ ཚོང་པ་དང་ མི་སེར་ཚུ་དང་ མཇལ་ཕྲད་མཛད་གནང་ཡོད་པའི་གནས་ཚུལ།