འབྲུག་གཞུང་དང་ ཨེ་ཤི་ཡ་ གོང་འཕེལ་དངུལ་ཁང་གིས་ ནུས་ཤུགས་དང་ ཁྲོམ་སྡེ་གོང་འཕེལ་གྱི་ ལས་འགུལ་ཁག་ ༢ ཀྱི་དོན་ལུ་ ཆིངས་ཡིག་གུ་ མཚན་རྟགས་བཀོད་ཡོདཔ།

པདྨ་དབང་འདུས།

སྤྱི་ཟླ་ ༧ པའི་ཚེས་ ༣༡ ལུ་ འབྲུག་གཞུང་དང་ ཨེ་ཤི་ཡ་ གོང་འཕེལ་དངུལ་ཁང་གི་བར་ན་ འབྲུག་གི་གཙང་དག་ནུས་ཤུགས་ཀྱི་ ཉེན་སྲུང་བཙན་ཐབས་དང་ གནམ་གཤིས་ཐུབ་པའི་ གཞི་རྟེན་མཁོ་ཆས་གོང་འཕེལ་ དེ་ལས་ ཀུན་ཚང་དང་ ཡུན་བརྟན་དཔལ་འབྱོར་གོང་འཕེལ་བཅས་ཀྱི་དོན་ལུ་ ལས་འགུལ་སྦོམ་ ༢ ཀྱི་ ཆིངས་ཡིག་གུ་ མཚན་རྟགས་བཀོད་གནང་ནུག།

ལས་འགུལ་དེ་ཚུ་ཡང་ ཉིན་དྲོད་གློག་མེའི་ ས་ཁོངས་རྒྱ་སྐྱེད་ཀྱི་དོན་ལུ་ ཨེ་ཤི་ཡ་ གོང་འཕེལ་དངུལ་ཁང་ལས་ སྐྱིན་འགྲུལ་ཡུ་ཨེཛ་ཌོ་ལར་ ས་ཡ་ ༡༦༠ དང་ གནང་སྦྱིན་ཡུ་ཨེཛ་ཌོ་ལར་ ས་ཡ་ ༠.༥ འབདཝ་ད་ ཡུ་ཨེཛ་ཌོ་ལར་བསྡོམས་ ས་ཡ་ ༡༦༠.༥ གི་དོན་ལུ་དང་  ཀུན་ཚང་དང་ ཡུན་ཐུབ་ཁྲོམ་སྡེ་ གོང་འཕེལ་ལས་འགུལ་གྱི་དོན་ལུ་ སྐྱིན་འགྲུལ་ཡུ་ཨེཛ་ཌོ་ལར་ ས་ཡ་ ༥.༠ དང་ གནང་སྦྱིན་ཡུ་ཨེཛ་ཌོ་ལར་ ས་ཡ་ ༥.༠ དེ་ལས་ ཨེ་ཤི་ཡ་དང་ པེ་སི་ཕིཀ་གི་ ལོངས་སྤྱོད་དང་ ཡུན་ཐུབ་ཀྱི་ རྒྱ་པཱན་མ་དངུལ་ནང་ལས་ གནང་སྦྱིན་ཡུ་ཨེཛ་ཌོ་ལར་ ས་ཡ་ ༣.༠ འབདཝ་ད་ ཡུ་ཨེཛ་ཌོ་ལར་བསྡོམས་ ས་ཡ་ ༡༣ འབད་མི་ཚུ་ཨིན་པས།

ཆིངས་ཡིག་དེ་ཚུ་གུ་ དངུལ་རྩིས་ལྷན་ཁག་དང་ ཨེ་ཤི་ཡ་ གོང་འཕེལ་དངུལ་ཁང་ འབྲུག་སླར་བྱུང་གློག་མེ་ལས་འཛིན་ འབྲུག་གློག་མེ་ལས་འཛིན་ རྒྱལ་ཡོངས་ཁྱིམ་བཟོ་གོང་འཕེལ་ལས་འཛིན་ ཕུན་ཚོགས་གླིང་ཁྲོམ་སྡེ་བཅས་ཀྱི་བར་ན་ མཚན་རྟགས་བཀོད་ནུག།