རྒྱ་པཱན་ལུ་ རེལ་ལི་ཐུག་རྐྱེན་ནང་ ལས་གཡོགཔ་ ༤ ལུ་ ཤི་རྐྱེན་བྱུང་ཡོདཔ།

བི་བི་སི།

སྤྱི་ཟླ་ ༨ པའི་ཚེས་ ༢༠ ལུ་ རྒྱ་པཱན་གྱི་རྒྱལ་ས་ ཊོ་ཀི་ཡོའི་ བྱང་ཁ་ཐུག་གི་ རེལ་ལི་འབབ་ཚུགས་ ཤིན་ཀ་ནུ་མ་ལུ་ རེལ་ལི་དང་ ཁ་ཐུག་རྐྱབ་པའི་ཤུལ་ལས་ ལས་གཡོགཔ་ ༤ ལུ་ ཤི་རྐྱེན་བྱུང་ནུག།

དེ་ཡང་ ས་གནས་ཀྱི་ དྲོ་པའི་ཆུ་ཚོད་ ༡༠ དང་ སྐར་མ་ ༤༦ དེ་ཅིག་ཁར་ ལས་མི་ཚུ་ ཧོན་ལྡུམ་སྐམ་ནི་གི་ སྨན་གཏོར་ཏེ་ སྡོད་པའི་སྐབས་ལུ་ ཁ་ཐུག་རྐྱབ་ནུག་ཟེར་ ཊོ་བུ་རེལ་ལིའི་ འགོ་དཔོན་ཅིག་གིས་ བཤད་ཡོདཔ་ཨིན་པས།

རེལ་ལི་དེ་ ཐུག་རྐྱེན་བྱུང་པའི་སྐབས་ལུ་ ཉེན་སྲུང་གི་ ལམ་སྟོན་ཚུ་ ལག་ལེན་འཐབ་ཡོད་མེད་ཀྱི་སྐོར་ལས་ ཁྲིམས་སྲུང་འགག་སྡེ་གིས་ ཞིབ་དཔྱད་ཚུ་འབད་དོ་ཟེར་ ཊོ་བུ་རེལ་ལིའི་ འགོ་དཔོན་ཚུ་གིས་ གནས་ཚུལ་ཞལ་འཛོམས་ཅིག་ནང་ གསལ་བཤད་འབད་ནུག།