རྒྱ་གར་ཚོང་དང་ བཟོ་གྲྭ་ཚོགས་སྡེའི་ནང་ལས་ སྨན་བཅོས་ཚོང་ལཱ་སྡེ་ཚན་གྱིས་ མི་རྗེ་བློན་ཆེན་གྱི་ སྐུ་མདུན་ལུ་བཅར་ཡོདཔ།

སྤྱི་ཟླ་ ༨ པའི་ཚེས་ ༢༠ ལུ་ རྒྱ་གར་ཚོང་དང་ བཟོ་གྲྭ་ཚོངས་སྡེའི་ནང་ལས་ སྨན་ཁང་དང་ གསོ་བའི་སྐྱོང་བཞག་ལས་ཚོགས་ སྦོམ་ཤོས་ཚུ་གི་ འཐུས་མི་སྡེ་ཚན་ཅིག་ མི་རྗེ་བློན་ཆེན་གྱི་ སྐུ་མདུན་ལུ་ བཅར་ཡོདཔ་ཨིན་པས།  

དེ་བསྒང་ མི་རྗེ་བློན་ཆེན་དང་ སྨན་བཅོས་ཚོང་ལཱ་སྡེ་ཚན་གྱིས་ རྒྱ་འབྲུག་ ༢ ཀྱི་བར་ན་ གསོ་བའི་སྐྱོང་བཞག་ནང་ མཉམ་འབྲེལ་བཙན་ཐབས་ཀྱི་སྐོར་ལས་ གསུང་གྲོས་གནང་པའི་ནང་གསལ་ སྨན་བཅོས་ཀྱི་དོན་ལུ་ ནདཔ་རྒྱ་གར་ལུ་ གཏང་ནི་དང་ ཁྱད་རིག་ཅན་གྱི་ གསོ་བའི་ཞབས་ཏོག་གོ་སྐབས་ དེ་ལས་ གསོ་བའི་ལས་སྡེའི་ནང་ སྔར་བ་ལྷག་པའི་ མཉམ་འབྲེལ་ཚུ་གི་སྐོར་ལས་ གསུང་གྲོས་བྱུང་ནུག།  

མི་རྗེ་བློན་ཆེན་གྱིས་ སྨན་བཅོས་ཚོང་ལཱ་སྡེ་ལུ་ བྱོན་ལེགས་ཡོད་ལུགས་དང་ གསོ་བའི་ལས་སྡེའི་ནང་ རྒྱ་འབྲུག་ ༢ ཀྱི་བར་ན་ ཡུན་རིང་གི་མཉམ་འབྲེལ་ལུ་ ཐུགས་ངལ་རངས་ཡོད་ལུགས་ཛུ་ གསུངས་ཡོདཔ་མ་ཚད་ སྤུས་ཚད་ཅན་གྱི་ གསོ་བའི་སྐྱོང་བཞག་ ལེགས་སྒྱུར་གཏང་ནི་དང་ འབྲུག་གི་གསོ་བའི་རིམ་ལུགས་ བཙན་ཐབས་འབད་ནི་ལུ་ ཕན་ཐབས་ཡོད་པའི་ མཉམ་འབྲེལ་ཚུ་ འཚོལ་ཞིབ་འབད་དགོཔ་ གལ་ཆེ་བའི་སྐོར་ལས་ཡང་ གསུང་གནང་ཡོད་པའི་གནས་ཚུལ།