མི་རྗེ་བློན་ཆེན་གྱིས་ འཛམ་གླིང་དྲན་ཚོར་བཟའ་ཆས་རིམ་ལུགས་ཀྱི་ དབུ་ཁྲིད་ཞལ་འཛོམས་ འགོ་འབྱེད་ནང་གྲལ་གཏོགས།

མི་རྗེ་བློན་ཆེན་གྱིས་ སྤ་རོ་ལུ་ འགོ་འདྲེན་འཐབ་མི་ འཛམ་གླིང་དྲན་ཚོར་བཟའ་ཆས་རིམ་ལུགས་ཀྱི་ དབུ་ཁྲིད་ཞལ་འཛོམས་ འགོ་འབྱེད་རྟེན་འབྲེལ་ནང་ གྲལ་གཏོགས་མཛད་ནུག།

ཞལ་འཛོམས་དེ་ནང་ འབྲུག་མི་དང་ འཛམ་གླིང་རྒྱལ་ཁབ་ ༦༠ ལྷགཔ་ཅིག་ལས་ རྒྱལ་སྤྱིའི་གྲལ་གཏོགས་པ་ཚུ་རྩིས་ཏེ་ མི་གྲངས་ ༤༠༠ ལྷགཔ་ཅིག་ཡོད་མིའི་གྲས་ཁར་ ཤྲཱི་ལངྐའི་བློན་ཆེན་ ཌོག་ཊར་ཧ་རི་ནི་ ཨ་མ་ར་སུ་རི་ཡ་དང་ འཛམ་གླིང་སྤྱི་ཚོགས་ཀྱི་ ཡོངས་ཁྱབ་དྲུང་ཆེན་བགྲེསཔ་ བཱན་ཀི་མུན་ དེ་ལས་ ཨི་ཡར་ལེན་གྱི་ སྲིད་འཛིན་བགྲེསཔ་ མེ་རི་རོ་བིན་སཱན་ཚུ་ཡོདཔ་ཨིན་པས།

དབུ་ཁྲིད་ཞལ་འཛོམས་དེ་ སྤྱི་ཟླ་ ༨ པའི་ཚེས་ ༣༡ ལས་ སྤྱི་ཟླ་ ༩ པའི་ཚེས་ ༤ ཚུན་ ཉིན་གྲངས་ ༥ གི་རིང་ལུ་ ཚོགས་གནང་ཡོདཔ་ད་ དེ་ཡང་ བཟའ་ཆས་རིམ་ལུགས་གཞི་སྒྱུར་གྱི་ དོན་གྱི་སྙིང་པོ་ ལག་ལེན་ཟེར་བའི་ བརྗོད་དོན་ཐོག་ལུ་ འབྲུག་གཞུང་དང་ དྲན་ཚོར་བཟའ་ཆས་རིམ་ལུགས་ཚོགས་པ་ དེ་ལས་ འཛམ་གླིང་སྤྱི་ཚོགས་ གོང་འཕེལ་ལས་རིམ་ཚུ་ མཉམ་འབྲེལ་ཐོག་ལས་ འགོ་འདྲེན་འཐབ་ནུག།