དེང་དུས་ཀྱི་རིག་རྩལཔ་ པདྨ་ལྷམོ་ལུ་ རུ་བིན་མིའུ་ཛི་ཡམ་ ཧི་མ་ལ་ཡའི་ རིག་རྩལ་གསོལ་རས།

མི་དབང་རྒྱལ་བཙུན་མཆོག་གིས་ སྤྱི་ཟླ་ ༩ པའི་ཚེས་ ༡༡ ལུ་ འབྲུག་གི་ཁས་བླངས་རིག་རྩལ་ཁང་ནང་ གསོལ་རས་ཀྱི་ རྟེན་འབྲེལ་ཅིག་ བརྩི་ཐོག་ལས་ སྤྱི་ལོ་ ༢༠༢༦ ལོའི་ རུ་བིན་མིའུ་ཛི་ཡམ་ ཧི་མ་ལ་ཡའི་ རིག་རྩལ་གསོལ་རས་དེ་ དེང་དུས་ཀྱི་རིག་རྩལཔ་ པདྨ་ལྷམོ་ལུ་ གནང་ཡོདཔ་ཨིན་པས།

རུ་བིན་མིའུ་ཛི་ཡམ་ ཧི་མ་ལ་ཡའི་ རིག་རྩལ་གསོལ་རས་དེ་ ཧི་མ་ལ་ཡའི་ ལམ་སྲོལ་གྱི་ བཟོ་རྣམ་དང་ ཐབས་རིག་ཚུ་གི་ སེམས་སྐུལ་ཐོག་ལུ་ ཐོན་རིམ་ཅན་གྱི་ དེང་དུས་ཀྱི་རིག་རྩལཔ་ཚུ་ལུ་ གནང་སྲོལ་ཡོདཔ་སྦེ་བཀོད་ནུག།

དེ་ཡང་ སྤྱི་ལོ་ ༢༠༢༤ ལུ་ གཞི་བཙུགས་འབད་མི་ རུ་བིན་མིའུ་ཛི་ཡམ་ ཧི་མ་ལ་ཡའི་ རིག་རྩལ་གསོལ་རས་དེ་ ཌོ་ལར་ ༣༠,༠༠༠ རེ་ ཐོབ་དོ་ཡོདཔ་ད་ འདས་དང་མ་འོངས་གཉིས་ཆ་རའི་ནང་ རིག་རྩལ་གྱི་ ཁེ་ཕན་ཡོད་པའི་ རིག་རྩལཔ་དྲག་ཤོས་ཚུ་ རྒྱལ་སྤྱིའི་དྲང་དཔོན་ཚུ་དང་ རུ་བིན་མིའུ་ཛི་ཡམ་གྱི་ ལས་གཡོགཔ་ཚུ་གིས་ གདམ་ཁ་རྐྱབ་དོ་ཡོདཔ་ཨིན་པས།