རྩང་མོ་དགའ་བའི་འཛུམ་ཟེར།

བསམ་འཕེལ་ནོར་བུ་བཟུམ་མའི། །ཧིང་ལས་དགའ་བའི་སྨིན་ཆུང་། །ཕྱག་དང་མཆོད་པ་ཕུལ་ཏེ། །ཁྱོད་ལུ་ཞབས་ཏོག་ཞུ་གེ །

དབང་པོ་སྒོ་ལྔ་ཚང་བའི། །མི་ལུས་རིན་ཆེན་ཐོབ་ད། །ན་གཞོན་དགའ་བའི་དགའ་སྤྲོ། །མཉམ་ཅིག་སྒྱུར་གེ་མིན་ན། །

དགའ་སྐྱིད་ལྡན་པའི་གཡུས་བཟང་། །ལྷ་ཡི་ཞིང་ཁམས་འདྲ་བས། །ལས་དབང་ཅན་གྱི་སྟག་ཤར། །དགའ་བའི་ཉམས་ཅིག་སྒྱུར་གེ །

ནང་སེམས་བྱམས་བརྩེ་ཆེ་ན། །ཕྱི་ཡི་སྤྱོད་རྣམ་མཛེས་པས། །སོལ་མོ་གནག་པའི་རང་བཞིན། །ཆུ་གིས་འཁྱུ་སྟེ་མི་དག །

རང་གི་བཟོ་ཉེས་མ་ཤེས། །གཞན་ལུ་མི་འཇའ་སླབ་མས། །ལོ་འདབ་མེད་པའི་ཤིང་ལུ། །གྱིབ་མ་བཏུབ་ཟེར་མ་སླབ། །

སྐྱིད་དང་སྡུག་པ་ཟེར་མི། །ད་རིས་ནངས་པའི་ཁྱད་པར། །ལས་ཀྱིས་བསྐོས་པའི་སྐྱིད་སྡུག །གདོང་ལེན་འབད་ར་འབད་དགོ །

སྐྱེ་རྒ་ན་འཆིའི་སྡུག་བསྔལ། །འཇིག་རྟེན་འཁོར་བའི་རང་བཞིན། །མི་དགོ་མི་བཅའ་སླབ་པར། །དབང་དང་ཚད་ཅིག་མིན་འདུག །

ལྕང་མ་ལྕང་ཤིང་ཡོམ་ཡོམ། །ཕར་གཡོ་ཚུར་གཡོ་མ་གནང་། །དགུན་གསུམ་དགུན་གྱི་དུས་ལུ། །ལྕང་མ་སྐམ་ཤིང་རང་རོང་། །

དགའ་བའི་བུ་མོ་མཛེས་མ། །བཞུགས་ས་ས་ཐག་རིང་སོང་། །ས་ཐག་རིང་པའི་བློ་མིན། །ང་རང་སེམས་ཐག་རིང་པས། །

མགར་བ་མཁས་པས་བཟོ་མི། །བུ་མོའི་འཕྲུལ་གྱི་ལྡེ་མིག །བུ་ཆུང་ཚོང་དཔོན་ངེད་ཀྱི། །བང་མཛོད་ཕྱེ་བར་འབྱོན་གནང་།།

ཡར་གྱི་རི་བོའི་རྩེ་གི །དཀར་པོ་བྱང་ཆུབ་མཆོད་རྟེན། །མཆོད་རྟེན་ནང་གཟུངས་མེད་པར། །སྐོར་ར་རྐྱབ་དགོ་མ་མནོ། །

གཙང་ཆབ་ཆུ་ཆེན་གུ་ལུ། །ཟམ་པ་བཙུགས་ཏེ་ཡོད་རུང་། །ཉ་རོགསཔ་རང་གི་དོན་ལུ། །ཟམ་པའི་དགོས་པ་མིན་འདུག །

མཐོ་བའི་སྒང་ལས་འབབ་ཚེ། །གཙང་ཆུ་གསུང་སྐད་ཆེ་རུང་། །པད་མའི་ཐང་ལུ་ལྷོད་ཚེ། །གསུང་སྐད་གར་སོང་མིན་འདུག །

ཆུང་དུས་ཕ་མས་གཅེས་རུང་། །གཞོན་དུས་གྲོགས་ཀྱིས་མ་གཅེས། །འཁོར་བའི་རང་བཞིན་འདི་ལུ། །གཅེས་དང་མ་གཅེས་མིན་འདུག །

རྒྱ་མཚོ་ཡངས་པའི་གླིང་ལུ། །དུང་དཀར་བརྒྱ་དང་སྟོངཡོད་། །རང་ལུ་དགོ་པའི་གཡས་འཁྱིལ། །མིག་གིས་མཐོང་སར་མིན་འདུག །