སྤྱི་ཟླ་ ༨ པའི་ཚེས་ ༡༩ ལས་རྒྱལ་ཁབ་ནང་ སྣུམ་འཁོར་གྱི་རིགས་ ནང་འདྲེན་བཀག་དམ།

སྒྲོལ་མ་ཡེ་ཤེས་དང་
བདེ་སྐྱིད་ཆོས་སྒྲོན།
སྤྱི་ཟླ་ ༨ པའི་ཚེས་ ༡༩ ལས་ རྒྱལ་ཁབ་ནང་ དགོས་མཁོ་སྦོམ་མེད་མི་ སྣུམ་འཁོར་གྱི་རིགས་ག་ར་ དུས་ཚོད་ངེས་མེད་ཐོག་ལས་ ནང་འདྲེན་བཀག་དམ་འབད་ཡི།
དེ་ཡང་ རྒྱལ་ཁབ་ཀྱི་ དཔལ་འབྱོར་ཡུན་བརྟན་སྦེ་ རྒྱུན་སྐྱོང་འཐབ་ནིའི་དོན་ལུ་ ཕྱི་དངུལ་ལངམ་སྦེ་ཡོདཔ་ ངེས་གཏན་བཟོ་ཐབས་ལུ་ཨིནམ་ད་ རྒྱལ་ཁབ་ནང་ ནད་ཡམས་ཀོ་ཝིཌ་-༡༩ གི་ སྒྲིག་གཞི་ལྷོད་ཡངས་བཏང་པའི་ཤུལ་ལས་ ཕྱི་དངུལ་ཟུར་གསོག་ མར་འབབ་སོང་ནུག།
ན་ཧིང་ སྤྱི་ཟླ་ ༣ པའི་ནང་ ཕྱི་དངུལ་ཟུར་གསོག་ ཡུ་ཨེཛ་ཌོ་ལར་ ཐེར་འབུམ་ ༡.༤ དེ་ཅིག་ཡོད་རུང་ དུས་ཅི་ སྤྱི་ཟླ་ ༣ པའི་ནང་ ཡུ་ཨེཛ་ཌོ་ལར་ ས་ཡ་ ༩༨༤.༨ འབདཝ་ད་ བརྒྱ་ཆ་ ༣༠ དེ་ཅིག་ མར་འབབ་སོང་ཡོདཔ་ལས་ རྒྱལ་ཁབ་ནང་ ཉེར་མཁོའི་རིགས་ ནང་འདྲེན་འབད་ནིའི་དོན་ལུ་ ཟླཝ་ ༩ མ་གཏོགས་ མི་ལང་ནི་ཨིན་པས།
དངུལ་རྩིས་ལྷན་ཁག་གིས་ དེ་བཟུམ་མའི་ ཐབས་ལམ་སྟོན་མི་འདི་ རྩ་ཁྲིམས་ཆེན་མོའི་དགོངས་དོན་ གོང་ལུ་བཀུར་ནི་དང་འབྲེལ་ཏེ་ འཛམ་གླིང་ནང་ཡང་ དཔལ་འབྱོར་གྱི་ དཀའ་ངལ་སེལ་ཐབས་ལུ་ ཕྱི་དངུལ་ཟུར་གསོག་ ཉེན་སྐྱོབ་ཀྱི་ ཐབས་ལམ་སྟོན་མི་དང་འཁྲིལ་ཏེ་ཨིན་ཟེར་ གསལ་བསྒྲགས་ཅིག་ནང་བཀོད་ནུག།
ཨིན་རུང་ སྐྱེལ་སྤྲོད་སྣུམ་འཁོར་དང་ ས་བརྐོ་འཕྲུལ་ཆས་ སོ་ནམ་འཕྲུལ་ཆས་ཚུ་ དངུལ་ཀྲམ་ས་ཡ་ ༡.༥ དང་ ཡང་ཅིན་ ཡུ་ཨེཛ་ཌོ་ལར་ ༢༠,༠༠༠ འོག་རྒྱུ་འབད་མི་དང་ ལྟ་བཤལ་གོང་འཕེལ་གྱི་དོན་ལས་ ལག་ལེན་འཐབ་མི་ སྣུམ་འཁོར་ཚུ་ ནང་འདྲེན་འཐབ་ཆོག་ཟེར་ཨིན་པས།
རྒྱལ་ཁབ་ནང་ སྣུམ་འཁོར་ནང་འདྲེན་ བཀག་དམ་དེ་ ཟླཝ་ ༦ གི་རིང་ལུ་ཨིནམ་ད་ དེ་ཡང་ ཟླཝ་ ༦ གི་ཤུལ་ལས་ ཕྱི་དངུལ་ཟུར་གསོག་དང་ དགོས་མཁོ་དང་བསྟུན་ཏེ་ བསྐྱར་ཞིབ་འབད་ནི་ཨིན་ཟེར་ བཀོད་འདུག་པའི་གནས་ཚུལ།