རྒྱ་གར་ལུ་ ཨོ་ཊོ་རིག་ཤའི་ དེད་གཡོགཔ་ཅིག་གིས་ རྒྱན་ཤོག་གསོལ་རས་ རུ་པི་བྱེ་བ་ ༢༥ ཐོབ་ཡོདཔ།

ཨིན་ཌི་ཡ་ ཨེགཛ་པེ་རེཛ།

སྤྱི་ཟླ་ ༩ པའི་ཚེས་ ༡༧ ལུ་ ཨོ་ཊོ་རིག་ཤའི་དེད་གཡོགཔ་ ཨ་ནུབ་ཀྱིས་ རྒྱ་གར་ཀེ་ར་ལ་ ཨོ་ནམ་རྒྱན་ཤོག་ལས་ རུ་པི་བྱེ་བ་ ༢༥ གསོལ་རས་ཐོབ་ཡོདཔ་ད་ དེ་གི་ཧེ་མར་ མ་ལེ་ཤི་ཡ་ལུ་ ཐབ་དཔོན་གྱི་ ལཱ་འབད་བར་འགྱོ་ནི་སྦེ་ དངུལ་ཁང་ནང་ལས་ དངུལ་ཀྲམ་འབུམ་ ༣ སྐྱིན་འགྲུལ་ཞུ་ནི་གི་ ཡི་གུ་བཙུགས་ཡོདཔ་བཞིན་དུ་ དངུལ་ཁང་ལས་ཡང་ གནང་བ་གྲུབ་ནུག།

ཁོ་གིས་ བཤད་དོ་བཟུམ་འབད་བ་ཅིན་ རྒྱན་ཤོག་གི་ གསོལ་རས་ཐོབ་པའི་ཤུལ་ལས་ སྐྱིན་འགྲུལ་ལེན་ནི་དང་ མ་ལེ་ཤི་ཡ་ལུ་ འགྱོ་ནི་ཚུ་ག་ར་ ཆ་མེད་བཏང་ཡི་ཟེར་ཨིནམ་ད་ ཁོ་གིས་ ད་ཚུན་ ལོ་ ༢༢ ཀྱི་རིང་ལུ་ རྒྱན་ཤོག་ཉོ་མིའི་ནང་ལས་ རུ་པི་འབུམ་ ༥ གིས་གཙོས་པའི་ དངུལ་དུམ་གྲ་རེ་ ཐོབ་ཅི་ཟེར་ཨིན་པས།

ད་རེས་ རྒྱན་ཤོག་གི་གསོལ་རས་ རུ་པི་བྱེ་བ་ ༢༥ ལས་ གཞུང་གི་ཁྲལ་ཚུ་ བཏོག་པའི་ཤུལ་ལུ་ རུ་པི་བྱེ་བ་ ༡༥ དེ་ཅིག་ ལག་པར་འཐོབ་ནི་ཨིན་པས།

དངུལ་དེ་གིས་ དང་པ་ར་ ཁོ་རའི་བཟའ་ཚང་ལུ་ སྡོད་ཁྱིམ་ཅིག་དང་ དེ་ལས་ ཕམ་སྤུན་ཆ་ཚུ་ལུ་ དུམ་གྲ་རེ་ བགོ་བྱིན་པའི་ ལྷག་ལུས་ཀྱིས་ ཀེ་ར་ལ་མངའ་སྡེའི་ནང་ བཟའ་ཁང་སྦོམ་ཅིག་ གཞི་བཙུགས་འབད་ནི་ཨིནམ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།