པ་ཀིཛ་ཏཱན་ལུ་ དུས་ནམ་ཡང་ བྱུང་མ་མྱོང་པའི་ ཆུ་རུད་ཀྱི་ རྐྱེན་ངན་ཚབས་ཆེན།

ཨཱལ་ཇ་ཟི་ར།

པ་ཀིཛ་ཏཱན་ལུ་ ཆུ་རུད་སྦོམ་ཐོན་ཏེ་ ཟླ་ངོ་ ༣ ལྷགཔ་ཅིག་ སོང་ཡོད་མི་འདི་ རྒྱལ་ཁབ་ནང་ དུས་ནམ་ཡང་ བྱུང་མ་མྱོང་པའི་ གནམ་གཤིས་འགྱུར་བ་དང་འབྲེལ་བའི་ འགྲོ་བ་མི་ལུ་གནོད་པའི་ དཀའ་ངལ་སྦོམ་ཤོས་ཅིག་ འོང་ནི་མས་ཟེར་ཨིན་པས།

དེ་ཡང་ ཆུ་རུད་ལུ་བརྟེན་ཏེ་ མི་གྲངས་ ༡,༥༠༠ དེ་ཅིག་ལུ་ ཤི་རྐྱེན་དང་ མི་སེར་ས་ཡ་ ༣༣ དེ་ཅིག་ལུ་ གནོད་སྐྱོན་བྱུང་ཡོདཔ་མ་ཚད་ ལོ་ཐོག་ཚུ་ཡང་ མེདཔ་བཏང་ཡོདཔ་ལས་ རྒྱལ་ཁབ་ཀྱི་ འགོ་ཁྲིདཔ་ཚུ་གིས་ ཆུ་རུད་ལུ་བརྟེན་པའི་ ནད་གཞི་དང་ བཀྲེས་སྐོམ་ལུ་བརྟེན་ཏེ་ ཤི་རྐྱེན་ཡར་འཕར་འགྱོ་ནི་ཨིན་པའི་ ཉེན་བརྡ་འབད་ནུག།

དེ་མ་ཚད་ ཉེན་སྲུང་མེད་པའི་ ཨ་ལོ་སྐྱེས་མི་ཚུ་ལུ་ ནད་རིགས་བཀག་ཐབས་ཀྱི་ སྨན་ཁབ་མ་རྐྱབ་མི་དང་ དོན་ཧིང་གི་ ནད་གཞི་ཡོད་མི་ གུ་རམ་གྱི་ ནད་གཞི་ཡོད་མི་ཚུ་ལུ་ཡང་ དུས་ཚོད་ཁར་ སྨན་བཅོས་མ་འབད་བར་ཡོདཔ་ལས་ གཟུགས་ཁམས་འཕྲོད་བསྟེན་ལུ་ གནོད་ཉེན་འབྱུང་ནི་གི་ ཉེན་ཁ་སྦོམ་འདུག་ཟེར་ འཛམ་གླིང་གསོ་བའི་ལས་སྡེ་གིས་ བཤད་ཡོདཔ་ཨིན་པས།

དེ་བཟུམ་སྦེ་ རྒྱལ་ཁབ་དེ་གིས་ ཆུ་རུད་ལུ་བརྟེན་པའི་ མི་དང་འབྲེལ་བ་ཡོད་མི་ དཀའ་ངལ་ཚུ་ འཕྲལ་མགྱོགས་ར་ བསལ་མ་ཚུགས་པ་ཅིན་ རྒྱལ་ཁབ་ནང་ མ་དངུལ་གྱི་ དཀའ་ངལ་འཐོན་ནི་གི་ ཉེན་ཁ་སྦོམ་ཡོད་པའི་སྐོར་ལས་ཡང་ འཛམ་གླིང་གསོ་བའི་ལས་སྡེ་གིས་ གསལ་བཤད་འབད་ནུག།

རྒྱལ་ཁབ་དེ་གིས་ ན་ཧིང་ སྤྱི་ཟླ་ ༡༢ པ་ཚུན་ལུ་ བུ་ལོན་ཌོ་ལར་ཐེར་འབུམ་ ༡ དེ་ཅིག་ སྤྲོད་མ་ཚུགས་པར་ཡོད་པའི་གུ་ དུས་ཅི་ སྤྱི་ཟླ་ ༨ པ་ཚུན་ལུ་ ད་རུང་ཡང་ ཌོ་ལར་ཐེར་འབུམ་ ༣༠ དེ་ཅིག་ བུ་ལོན་ཆགས་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།