ཚོགས་རྒྱན་བསྐྱུར་ནིའི་དོན་ལུ་ ད་ལས་ཕར་ མི་ཁུངས་ངོ་སྤྲོད་ལག་ཁྱེར་ ལག་ལེན་འཐབ་ནི།

ནོར་བུ་བཟང་མོ།
དུས་ཅི་ རྒྱལ་ཡོངས་ཚོགས་སྡེའི་ བཙག་འཐུ་ཐེངས་ ༤ པ་ལས་ འགོ་བཙུགས་ཏེ་ ད་ལས་ཕར་ ཚོགས་རྒྱན་ས་ཁོངས་ཚུ་ནང་ ཚོགས་རྒྱན་བསྐྱུར་བར་ འགྱོ་བའི་སྐབས་ལུ་ ཚོགས་རྒྱན་བཙུགས་ཆོག་པའི་ ངོས་འཛིན་འདྲ་པར་གྱི་ཚབ་ལུ་ མི་ཁུངས་ངོ་སྤྲོད་ལག་ཁྱེར་ ལག་ལེན་འཐབ་ནི་ཨིན་པས།
དེ་ཡང་ ཟད་འགྲོ་མར་ཕབ་ལུ་དམིགས་ཏེ་ཨིན་ཟེར་ འབྲུག་གི་བཙག་འཐུ་ལྷན་ཚོགས་ལས་ ཆེ་མཐོའི་འགོ་དཔོན་ཅིག་གིས་ བཤད་ཡོདཔ་ད་ ངོས་འཛིན་འདྲ་པར་ཚུ་ པར་བསྐྲུན་གྱི་དོན་ལུ་ རྫོང་ཁག་ ༢༠ གི་ནང་ པར་འཕྲུལ་ ༢༠ བཀྲམ་སྤེལ་འབད་དགོཔ་ལས་ ཟད་འགྲོ་སྦོམ་སྦེ་ར་ གནསཔ་མས་ཟེར་ཨིན་པས།
ཨིན་རུང་ བཙག་འཐུའི་སྐབས་ལུ་ དཀའ་ངལ་དུམ་གྲ་རེ་ འཐོན་ནི་བཟུམ་ཅིག་ཡོད་མི་དེ་ཡང་ བཙག་འཐུའི་ངོས་འཛིན་འདྲ་པར་དེ་ སྐྱེས་ལོ་ ༡༨ ཡན་ཆད་ལུ་མ་གཏོགས་ བྱིན་ནི་མེད་རུང་ མི་ཁུངས་ངོ་སྤྲོད་ལག་ཁྱེར་འདི་ སྐྱེས་ལོ་ ༡༥ ཡན་ཆད་ལུ་ ཐོབ་ནི་དེ་གིས་ཨིནམ་ད་ ཚོགས་རྒྱན་བསྐྱུར་མིའི་ ཐོ་ཡིག་ནང་ ཚོགས་རྒྱན་བསྐྱུར་ནི་ལུ་ ཁྱད་ཚད་ལྡན་པའི་ ཁ་གསལ་རྐྱངམ་ཅིག་མ་གཏོགས་ མི་ཁུངས་ངོ་སྤྲོད་ལག་ཁྱེར་ ཐོབ་རེ་ཐོབ་ཚད་ཅིག་གི་ ཁ་གསལ་ཚུ་ མེདཔ་ཨིན་པས།
ག་དེ་སྦེ་ཨིན་རུང་ དེ་བཟུམ་མའི་ ཐབས་ལམ་སྟོན་མི་འདི་གིས་ ད་ལས་ཕར་ བཙག་འཐུའི་སྐབས་ལུ་ ཟད་འགྲོ་མར་ཕབ་འགྱོ་བའི་ ཁེ་ཕན་ཡོད་པའི་གུ་ དམིགས་བསལ་གྱིས་ ད་རེས་ ནད་ཡམས་ཀྱི་ གནས་སྟངས་ནང་ འགྲོ་སོང་སྦོམ་ གནས་པའི་དུས་ཚོད་ཁར་ ཧེང་སྐལ་ར་ ལྷན་ཐབས་འབད་འོང་ཟེར་ བཤདཔ་ཨིན་པའི་གནས་ཚུལ།

Please follow and like us: