མི་རྗེ་བློན་ཆེན་གྱིས་ ཇར་མ་ནིའི་ དབུ་ཁྲིད་དང་མཇལ་ཕྲད།

སྤྱི་ཟླ་ ༣ པའི་ཚེས་ ༡༣ ལུ་ མི་རྗེ་བློན་ཆེན་ ཌོག་ཊར་བློ་གྲོས་ཚེ་རིང་གིས་ བར་ལིན་ལུ་ ཇར་མ་ནིའི་དབུ་ཁྲིད་ ཨོ་ལཱཕ་ཤི་ཀཱོལཛ་དང་ མཇལ་ཕྲད་གནང་ཡོདཔ་ད་ དེ་གི་ཧེ་མར་ དམག་མི་ཚུ་གིས་ སྟི་སྭ་ཞུ་ཐོག་ལས་ ཕེབས་བསུ་ཞུ་བའི་ཤུལ་ལུ་ དབུ་ཁྲིད་ ༢ ཀྱི་བར་ན་ ཕན་ཚུན་ལུ་ཕན་པའི་ གནད་དོན་ཚུ་གི་སྐོར་ལས་ གསུང་གྲོས་གནང་ཡོདཔ་ཨིན་པས།
དེ་གི་དྲོ་པར་ ཇར་མ་ནིའི་ སྲིད་འཛིན་དང་ མཇལ་ཕྲད་ཞུ་ཡོདཔ་ད་ འབྲུག་དང་ ཇར་མ་ནི་ རྒྱལ་ཁབ་ ༢ ཀྱི་བར་ན་ སྤྱི་ལོ་ ༢༠༢༠ སྤྱི་ཟླ་ ༡༡ པའི་ནང་ གཞི་བཙུགས་འབད་མི་ མཐུན་འབྲེལ་འདི་ ལྷག་པར་དུ་ རྩ་བརྟན་བཟོ་ནི་དང་ ད་ལས་ཕར་ མཉམ་འབྲེལ་འབད་ནིའི་ ལས་དོན་ཚུ་གི་སྐོར་ལས་ཡང་ གསུང་གྲོས་གནང་ནུག།
འབྲུག་རྒྱལ་ཁབ་ཀྱིས་ ནད་ཡམས་ཐོན་པའི་སྐབས་ལུ་ འཛིན་སྐྱོང་ལེགས་ཤོམ་སྦེ་ འཐབ་ཐོག་ལས་ སྨན་ཁབ་ཚུ་ ཁྱབ་ཆེར་བཙུགས་ཚུགས་མི་ལུ་ ཇར་མ་ནིའི་ དབུ་ཁྲིད་ཀྱིས་ བསྟོད་བསྔགས་མཛད་ཡོདཔ་ད་ མི་རྗེ་བློན་ཆེན་གྱིས་ མི་དབང་མངའ་ཞབས་མཆོག་གི་ དབུ་ཁྲིད་བཟང་པོའི་འོག་ལུ་ ནད་ཡམས་བཀག་ཐབས་དང་ ད་རེས་ནངས་པར་ རྒྱལ་ཁབ་ནང་ ལེགས་བསྒྱུར་སྦོམ་ འབད་དོ་ཡོད་པའི་སྐོར་ལས་ གསུངས་ཡོདཔ་ཨིན་པས།
ཞལ་འཛོམས་མཇུག་བསྡུཝ་དང་འབྲེལ་ཏེ་ མཉམ་རུབ་ཐོག་ལས་ གནས་ཚུལ་ཞལ་འཛོམས་ཅིག་ འཚོགས་པའི་སྐབས་ལུ་ འབྲུག་གི་རྒྱལ་ཡོངས་དགའ་སྐྱིད་དཔལ་འཛོམས་སྐོར་ལས་ དྲི་བ་བཀོད་མི་ཚུ་ལུ་ མི་རྗེ་བློན་ཆེན་གྱིས་ ལན་གསལ་གསུངས་ཡོད་པའི་གནས་ཚུལ།

Please follow and like us: