མི་སྡེ་བརྡ་བརྒྱུད་ལུ་བརྟེན་ཏེ་ སེམས་ཁམས་དང་ གཟུགས་ཁམས་གཉིས་ཆ་ར་ལུ་གནོད་སྐྱོན།

དབྱངས་ཅན་ལྷ་མོ།

ང་བཅས་རའི་ འགྲོ་བ་མི་མང་ལུ་ མི་སྡེ་བརྡ་བརྒྱུད་ལུ་བརྟེན་ཏེ་ ཤེས་ཡོན་དང་ རིག་རྩལ་གསརཔ་ཚུ་ འཐོབ་ནིའི་ནང་ ཕན་ཐོགས་ཡོད་རུང་ སེམས་ཁམས་དང་ གཟུགས་ཁམས་གཉིས་ཆ་ར་ལུ་ གནོད་པ་སྦོམ་ཡོདཔ་ཨིན་པས།

དེ་ཡང་ ཚན་རིག་མཁས་མཆོག་ཚུ་གིས་ བཤད་དོ་བཟུམ་འབད་བ་ཅིན་ སྐྱེས་ལོ་ ༡ དང་ ༢ ཀྱི་བར་ན་འབད་མི་ ཨ་ལོ་ཚུ་ལུ་ མི་སྡེ་བརྡ་བརྒྱུད་ ཡུ་ཊུབ་ལ་སོགས་པ་ཚུ་ ལྟ་བཅུག་སྟེ་ བཞག་པ་ཅིན་ ཁ་སླབ་ནི་དང་ ལམ་འགྱོ་ནི་ལུ་ གནོད་པ་སྦོམ་ཡོད་ཟེར་ཨིན་པས།

དེ་མ་ཚད་ ལོ་ན་མ་སྨིན་མི་ཚུ་ལུ་ཡང་ མི་སྡེ་བརྡ་བརྒྱུད་དེ་ དུས་ཡུན་རིངམོ་སྦེ་ ལག་ལེན་འཐབ་བཅུག་པ་ཅིན་ སེམས་ཁམས་ཀྱི་ ནད་གཞི་འཐོབ་ནི་དང་ རང་སྲོག་གཅད་ནི་ལ་སོགས་པའི་ མནོ་བསམ་ངན་པ་ཚུ་ཡང་ འབྱུངམ་ཨིན་ཟེར་ བཤདཔ་ཨིན་པས།

ད་རེས་ནངས་པར་ ཨ་ལོའི་ཕམ་ཚུ་གིས་ ཨ་ལོ་ཚུ་ སེམས་ཡེངས་བཅུག་ནིའི་དོན་ལས་ འགྲུལ་འཕྲིན་ནང་ མི་སྡེ་བརྡ་བརྒྱུད་ ཡུ་ཊུབ་ལ་སོགས་པ་ཚུ་ ལྟ་བཅུག་སྟེ་ བཞག་དོ་ཡོདཔ་ཨིན་པས།

ཕམ་ལ་ལོ་ཅིག་གིས་ བཤད་དོ་བཟུམ་འབད་བ་ཅིན་ ད་རེས་ནངས་པར་ ཨ་ལོ་སྐྱེས་ལོ་འདྲ་མཉམ་ཨིན་རུང་ མཐའ་ཟུར་ནང་སྡོད་མི་ ཨ་ལོ་ཚུ་གིས་ མགྱོགས་པ་ར་ ལམ་འགྱོ་བའི་ཁར་ ཁ་སླབ་ནི་ཚུ་ཡང་ ཤེས་པས་ཟེར་ཨིན་པས།

དེ་ཡང་ གྲོང་གསེབ་ནང་སྡོད་མི་ ཨ་ལོ་ཚུ་གིས་ འགྲུལ་འཕྲིན་དང་ འཕྲུལ་ཆས་ཚུ་ ལག་ལེན་མ་འཐབ་ནི་དེ་གིས་ཨིནམ་ད་ མི་སྡེ་བརྡ་བརྒྱུད་དེ་ ལེགས་ཤོམ་སྦེ་ ལག་ལེན་འཐབ་པ་ཅིན་ ཕན་ཐོགས་ཡོདཔ་ཨིན་རུང་ དེ་བ་ལྷག་པའི་ གནོད་པ་ཡང་སྦོམ་སྦེ་ར་ འབྱུང་དོ་ཡོདཔ་ཨིན་པའི་གནས་ཚུལ།