ཡུ་ཨེཛ་ཌོ་ལར་ སྤྲོད་ཐོག་ལས་ འབྲུག་ལུ་འོང་མི་ བལྟ་བཤལཔ་ཚུ་ལུ་ ཡུན་བརྟན་གོང་འཕེལ་གྱི་འཐུས་ བརྒྱ་ཆ་ ༥༠ མར་ཕབ།

སྤྱི་ཟླ་ ༨ པའི་ཚེས་ ༢༥ ལུ་ བཟོ་གྲྭ་ཚོང་ལས་དང་ ལཱ་གཡོག་ལྷན་ཁག་གིས་ གནས་ཚུལ་གསར་བཏོན་ཅིག་ནང་ བཀོད་དོ་བཟུམ་འབད་བ་ཅིན་ བལྟ་བཤལ་ལས་སྡེའི་དོན་ལུ་ སེམས་ཤུགས་མཐུན་རྐྱེན་གསརཔ་ཅིག་ འགོ་བཙུགས་ཅི་ཟེར་ཨིན་པས།
དེ་ཡང་ ཡུ་ཨེཛ་ཌོ་ལར་ སྤྲོད་ཐོག་ལས་ འབྲུག་ལུ་འོང་མི་ བལྟ་བཤལཔ་ཚུ་ལུ་ ཡུན་བརྟན་གོང་འཕེལ་གྱི་འཐུས་ ཉིན་རེར་ཡུ་ཨེཛ་ཌོ་ལར་ ༢༠༠ རེ་ བཀལ་སྲོལ་ཡོད་མི་དེ་ ཡུ་ཨེཛ་ཌོ་ལར་ ༡༠༠ འབདཝ་ད་ བརྒྱ་ཆ་ ༥༠ རེ་ མར་ཕབ་འབད་ནུག།
མཐུན་རྐྱེན་དེ་ ཡུ་ཨེཛ་ཌོ་ལར་སྤྲོད་མི་ བལྟ་བཤལཔ་ཨ་ལོ་ སྐྱེས་ལོ་ ༦ ལས་ ༡༢ ཀྱི་བར་ན་འབད་མི་ཚུ་ལུ་ཡང་ ཆ་གནས་ཡོདཔ་ད་ རྒྱལ་ཁབ་ཀྱི་ ས་མཚམས་བདའ་སྟེ་སྡོད་མི་ བལྟ་བཤལཔ་ཚུ་གི་དོན་ལས་ དུས་ཡུན་ཆུ་ཚོད་ ༢༤ གི་རིང་ལུ་ ཡུན་བརྟན་གོང་འཕེལ་གྱི་འཐུས་དེ་ འཕྲོ་མཐུད་དེ་ར་ དགོངས་ཡངས་སྦེ་ བཞག་ནི་ཨིན་པས།
མཐུན་རྐྱེན་དེ་ཡང་ སྤྱི་ཟླ་ ༩ པའི་ཚེས་ ༡ ལས་ འགོ་བཙུགས་ཏེ་ བསྟར་སྤྱོད་འབད་ནི་ཨིནམ་ད་ དེ་བཟུམ་མའི་ སེམས་ཤུགས་མཐུན་རྐྱེན་ འགོ་བཙུགས་དགོ་མི་དེ་ཡང་ བལྟ་བཤལ་ལས་སྡེའི་ནང་ ལཱ་གཡོག་གཏོན་ནི་དང་ ཕྱི་དངུལ་གྱི་ འབབ་ཁུངས་བཟོ་ནི་ དེ་ལས་ འབྲེལ་ཡོད་བཟོ་གྲྭ་ཚུ་ལུ་ ཁེ་ཕན་འབྱུང་ནི་དང་ སྤྱིར་བཏང་རྒྱལ་ཁབ་ཀྱི་ དཔལ་འབྱོར་ལུ་ཡང་ ཕན་ཐོགས་ཡོད་ནི་འདི་གིས་ཨིན་ཟེར་ གནས་ཚུལ་གསར་བཏོན་ནང་ བཀོད་འདུག་པའི་གནས་ཚུལ།

Please follow and like us: