ཡུ་ཀེ་རེན་ལུ་ ར་ཤི་ཡའི་ཁ་ཐུག་ལས་ ཕྱད་མདའ་རྐྱབ་པར་ བཏང་ནིའི་དོན་ལུ་ ཀིའུ་བའི་ན་གཞོན་ཚུ་ནག་ཚོང་།

རོའི་ཊརཛ།
སྤྱི་ཟླ་ ༩ པའི་ཚེས་ ༨ ལུ་ སྐྱེ་བོ་ནག་ཚོང་རྐྱབ་མི་ཚུ་གིས་ ར་ཤི་ཡའི་ ཁ་ཐུག་ལས་ ཡུ་ཀེ་རེན་ལུ་ ཕྱད་མདའ་རྐྱབ་པར་ བཏང་ནིའི་དོན་ལས་ ན་གཞོན་ཚུ་ ནག་ཚོང་རྐྱབ་ཡོད་པའི་ ཉེས་འཛུགས་ཐོག་ལུ་ འབྲེལ་ཡོད་དབང་འཛིན་ཚུ་གིས་ མི་ངོམ་ ༡༧ འཛིན་བཟུང་འབད་ནུག།
དེ་ཡང་ ཀིའུ་བའི་དབང་འཛིན་ཚུ་གིས་ བཤད་དོ་བཟུམ་འབད་བ་ཅིན་ ཀིའུ་བ་དང་ ར་ཤི་ཡ་ རྒྱལ་ཁབ་གཉིས་ཆ་རའི་ནང་ དེ་བཟུམ་མའི་ ན་གཞོན་ནག་ཚོང་རྐྱབ་མི་ཚུ་ཡོདཔ་ལས་ ནག་ཚོང་གི་འབྲེལ་དོན་ རྩ་མེད་གཏང་ནིའི་དོན་ལུ་ ལཱ་ཚུ་འབད་དོ་ཟེར་ཨིན་པས།
ཁྲིམས་རྩོདཔ་ཇོ་སེ་ལུ་ཡི་རེ་ཡེཛ་གིས་ དེ་བཟུམ་མའི་ ལཱ་བྱ་འཐབ་མི་ཚུ་ལུ་ ཉེས་འགེལ་གྱི་ ཚབས་ཆེ་ཧིང་དང་འཁྲིལ་ཏེ་ བཙོན་ཁྲིམས་ལོ་ངོ་ ༣༠ ལས་ ཚེ་བཙོན་ཚུན་དང་ ཡང་ཅིན་ སྲོག་ཐོག་གི་ ཉེས་ཁྲིམས་ཡང་ སྨིན་སྲིད་ནི་ཟེར་བཤད་ནུག།
ར་ཤི་ཡ་དང་ ཀིའུ་བའི་བར་ན་ སྲིད་དོན་གྱི་ འབྲེལ་བ་དམ་ཟབ་ཡོདཔ་ལས་ དཔལ་འབྱོར་གྱི་ དཀའ་ངལ་ཐོན་མི་ ཀིའུ་བའི་མི་སེར་ཚུ་ ཧེ་མ་ལས་ར་ ར་ཤི་ཡ་ལུ་ འགྱོ་སྲོལ་ཡོདཔ་ཨིན་པས།
དེ་ཡང་ ན་ཧིང་ ར་ཤི་ཡའི་སྲིད་འཛིན་ པུ་ཊིན་གྱིས་ ཕྱི་ཁའི་མི་སེར་ ར་ཤི་ཡའི་ དམག་མི་ནང་ འཛུལ་འདོད་ཡོད་མི་ཚུ་ལུ་ ར་ཤི་ཡའི་ མི་ཁུངས་ཚུ་ མགྱོགས་དྲགས་སྦེ་ བྱིན་ནི་ཨིན་ཟེར་བའི་ བཀའ་རྒྱ་ཅིག་བཏོན་ནུག།
ཀིའུ་བའི་ཁ་ཐུག་ལས་ ཡུ་ཀེ་རེན་གྱི་ ཕྱད་མདའི་ནང་ ཁོང་གི་མི་སེར་ཚུ་ གླ་ཐོག་དམག་མི་སྦེ་ འཛུལ་མི་དེ་ལུ་ ངོས་ལེན་མེདཔ་སྦེ་ བཤདཔ་ཨིན་པས་ཟེར་བཀོད་འདུག་པའི་གནས་ཚུལ།

Please follow and like us: