མི་དབང་རྒྱལ་བཙུན་མཆོག་དང་ མི་དབང་རྒྱལ་སྲས་ ཨྱོན་དབང་ཕྱུག་མཆོག་ ད་ས་ཡིན་ ཊི་ཀའི་དུས་སྟོན་ལུ་ཆིབས་བསྐྱོད།

སྤྱི་ཟླ་ ༡༠ པའི་ཚེས་ ༢༤ གི་དྲོ་པར་ མི་དབང་རྒྱལ་བཙུན་མཆོག་དང་ མི་དབང་རྒྱལ་སྲས་ ཨྱོན་དབང་ཕྱུག་མཆོག་ ཀུན་གསལ་ཕོ་བྲང་ལུ་ ཧིན་དྷུའི་ལྷ་ཁང་ནང་ ད་ས་ཡིན་ ཊི་ཀའི་དུས་སྟོན་ལུ་ ཆིབས་བསྐྱོད་གནང་ནུག།
དེ་བསྒང་ མི་དབང་རྒྱལ་བཙུན་མཆོག་དང་ མི་དབང་རྒྱལ་སྲས་རྣམ་གཉིས་ལུ་ ཉིན་གྲངས་ ༡༠ གྱི་རིང་ལུ་ ལྷ་མོ་རྫོང་གཉེར་མའི་ ཆོ་ག་གནང་མི་ པནྜི་ཏ་ཚུ་ལས་ ཊི་ཀ་བཞེས་ཡོདཔ་ཨིན་པས།
མི་དབང་རྒྱལ་བཙུན་མཆོག་གིས་ ལྷ་ཁང་ནང་ ཐུགས་སྨོན་ཚུ་ གནང་ཡོདཔ་མ་ཚད་ མི་དབང་རྒྱལ་བཙུན་དང་ མི་དབང་རྒྱལ་སྲས་མཆོག་ མཇལ་བར་དང་ སྨོན་ལམ་བཏབ་ནིའི་དོན་ལས་ སྤུངས་འཛོམས་འབད་མི་ཚུ་དང་ཡང་ མཇལ་ཕྲད་མཛད་གནང་ནུག།
ད་ས་ཡིན་ དུས་སྟོན་དེ་ འབྲུག་གི་ཧིན་དྷུའི་མི་སྡེ་ལུ་ གལ་གནད་ཆེ་བའི་ དུས་སྟོན་ཅིག་ཨིནམ་ད་ དེ་ཡང་ རྒྱལ་པོ་དགའ་བྱེད་ཀྱིས་ ལངྐ་མགྲིན་བཅུ་ལས་ རྒྱལ་ཁ་ཐོབ་སྟེ་ དགེ་བའི་ལཱ་གིས་ མི་དགེ་བའི་ལཱ་ལས་ རྒྱལ་ཁ་ཐོབ་པའི་ བརྡ་མཚོན་ལུ་ཨིན་པས།
རྒྱལ་པོ་དགའ་བྱེད་ཀྱི་ རྣམ་ཐར་ལྟར་དུ་འབད་བ་ཅིན་ ལྷ་མོ་རྫོང་གཉེར་མ་ལུ་ གསོལཝ་བཏབ་པའི་ ཉིན་གྲངས་བཅུ་པར་ ལངྐ་མགྲིན་བཅུ་དང་ ཕྱད་མདའི་ནང་ལས་ རྒྱལ་ཁ་ཐོབ་ནུག།
དེ་འབདཝ་ལས་ ད་ས་ཡིན་དེ་ བཟའ་ཚང་ནང་མི་ཚུ་ གཅིག་ཁར་འཛོམས་ཏེ་ བརྩི་སྲུང་ཞུ་དོ་ཡོདཔ་ད་ དེ་བསྒང་ ཨ་ལོ་ཚུ་གི་ བདེ་སྲུང་དོན་ལས་ བྱིན་རླབས་བཟུམ་ཅིག་སྦེ་ ཕམ་ཚུ་གིས་ རང་སོའི་ཨ་ལོ་ཚུ་ལུ་ ཊི་ཀ་བཀལ་སྲོལ་ཡོདཔ་ཨིན་པའི་གནས་ཚུལ།

Please follow and like us: