ཡུ་ཨེཛ་གིས་ ཡུ་ཀེ་རེན་ལུ་ དམག་གི་གྲོགས་རམ།

བི་བི་སི།
སྤྱི་ཟླ་ ༡༢ པའི་ཚེས་ ༢༨ ལུ་ ཡུ་ཨེཛ་གིས་ ད་རུང་ཡང་ ཡུ་ཀེ་རེན་གྱི་དོན་ལས་ དམག་གི་གྲོགས་རམ་ ཌོ་ལར་ས་ཡ་ ༢༥༠ གི་ གནང་བ་གྲོལ་ཡོདཔ་ད་ གྲོགས་རམ་དེ་ནང་ མཁའ་ཐོག་སྲུང་སྐྱོབ་དང་ གོ་མཚོན་ དེ་ལས་ གོ་མཚོན་ཆུང་ཀུའི་རིགས་དང་ སྟོབས་ཀྱི་བཟློག་འཕྲུལ་ཚུ་ ཚུདཔ་ཨིན་པས།
དེ་ཡང་ ཡུ་ཨེཛ་གི་ ཚོགས་ཁང་ནང་ལས་ ཡུ་ཀེ་རེན་ལུ་ གྲོགས་རམ་གསརཔ་ བྱིན་ནི་དེ་ མཚམས་འཇོག་འབད་ཡོདཔ་ལས་ གྲོགས་རམ་དེ་ མཐའ་མཇུག་འོང་ནི་ཨིན་པས།
ཡུ་ཀེ་རེན་གྱིས་འབད་བ་ཅིན་ ནུབ་ཕྱོགས་རྒྱལ་ཁབ་ཚུ་ལས་ གྲོགས་རམ་ཁ་སྐོང་ མ་འཐོབ་པ་ཅིན་ ཁོང་གི་ཕྱད་མདའི་བརྩོན་ཤུགས་དང་ མི་མང་གི་ མ་དངུལ་ལུ་ ཉེན་ཁ་ཕོག་ནི་མས་ཟེར་ཨིན་པས།
མ་གཞི་ ཡུ་ཀེ་རེན་གྱི་ ཕྱད་མདའི་ནང་ ཡུ་ཨེཛ་ཚོགས་ཁང་ལས་ རྒྱབ་སྐྱོར་ཡོད་རུང་ རི་པབ་ལི་ཀཱན་ སྲིད་ཚོགས་ཀྱི་ འཐུས་མི་ཚུ་གིས་ ཡུ་ཨེཛ་གི་ གྲོགས་རམ་གང་རུང་ནང་ ཡུ་ཨེཛ་དང་ མེག་སི་ཀོའི་ ས་མཚམས་སྒྲིང་སྒྲིང་བཟོ་ནི་ལུ་ གནད་དོན་ཆ་ཤས་སྦེ་ བཀོད་དགོ་ཟེར་བཤད་དེ་ ཡུ་ཀེ་རེན་ལུ་ རྒྱབ་སྐྱོར་འབད་ནི་གི་ གྲོས་འདེབས་དེ་ བཀག་ཆ་འབད་ནུག།
ཨིན་རུང་ ད་རེས་ཀྱི་ གྲོགས་རམ་གྲས་ཁར་ཡོད་མི་ གོ་མཚོན་ཚུ་གི་ཐེད་ཁར་ ཚོགས་ཁང་ལས་ གནང་བ་ལེན་མ་དགོ་པར་ མཛོད་ཁང་ནང་ལས་ གཏོན་ཆོག་དོ་ཡོདཔ་ད་ ཡུ་ཨེཛ་གི་ རྒྱལ་ཁམས་དྲུང་ཆེན་གྱིས་ ཡུ་ཀེ་རེན་ལུ་ དམག་གི་གྲོགས་རམ་ བྱིན་ནི་ལུ་ ཚོགས་ཁང་ནང་ལས་ གྲོས་ཐག་མགྱོགས་པར་བཅད་པ་ཅིན་ ཡུ་ཀེ་རེན་གྱི་ མ་འོངས་ཉེན་སྲུང་མ་ཚད་ ཡུ་ཨེཛ་གི་ རྒྱལ་ཡོངས་ཉེན་སྲུང་དང་ མཐའ་དོན་ཚུ་ཡང་ ངེས་གཏན་བཟོ་ཚུགས་ཟེར་ཨིན་པས།
ཡུ་རོབ་རྒྱལ་ཁབ་ཚོགས་པ་གིས་ཡང་ ཡུ་ཀེ་རེན་ལུ་ ཡུ་རོ་ཐེར་འབུམ་ ༥༠ གྲོགས་རམ་བྱིན་ནི་འབདཝ་ད་ ཧང་ག་རི་གིས་ བཀག་ཆ་འབད་དེ་ཡོདཔ་ལས་ ད་རེས་ ཡུ་ཀེ་རེན་གྱི་ འཆར་དངུལ་དེ་ ཌོ་ལར་ཐེར་འབུམ་ ༤༣ དེ་ཅིག་ རྩིས་ཆད་ཐོན་ཏེ་ཡོདཔ་ལས་ ནུབ་ཕྱོགས་རྒྱལ་ཁབ་ཚུ་གིས་ གྲོགས་རམ་མ་འབད་བ་ཅིན་ གཞུང་གཡོགཔ་ཚུ་གི་ དངུལ་ཕོགས་དང་ འཚོ་རྟེན་མ་དངུལ་ཚུ་ དུས་ཚོད་ཁར་ སྤྲོད་མ་ཚུགས་པར་ ལུས་ནི་གི་ ཉེན་ཁ་ཡོདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: