སྤྱི་ལོ་ ༢༠༢༤ ལོར་ ཡུ་ཨེཛ་གི་ མེ་ཡིན་མངའ་སྡེའི་ནང་ སྲིད་འཛིན་བགྲེསཔ་ཊཱམ་དེ་ བཙག་འཐུའི་ནང་ལས་ཕྱིར་བཏོན།

སི་ཨེན་ཨེན།

ཡུ་ཨེཛ་གི་ མངའ་སྡེ་མེ་ཡིན་གྱི་ བཙག་འཐུ་གཙོ་འཛིན་གྱིས་ སྤྱི་ལོ་ ༢༠༢༤ ལུ་ འགོ་ཐོག་བཙག་འཐུའི་ནང་ སྲིད་འཛིན་བགྲེསཔ་ཊཱམ་གྱིས་ གྲལ་གཏོགས་འབད་མ་ཆོགཔ་སྦེ་ བཟོ་ཡོདཔ་ཨིན་པས།

མེ་ཡིན་མངའ་སྡེའི་དྲུང་ཆེན་ ཤེ་ན་བེ་ལཱཛ་གིས་ གྲོས་ཆོད་དེ་གི་སྐོར་ལས་ ཊཱམ་གྱིས་ མངའ་སྡེའི་ཁྲིམས་ཁང་ནང་ མཐོ་གཏུགས་འབད་འོང་མནོ་སྟེ་ བསྣར་འགྱངས་ཐོག་ལུ་ བཞག་ཡོདཔ་བཞིན་དུ་ ཊཱམ་གྱི་སྡེ་ཚན་གྱིས་ཡང་ མཐོ་གཏུགས་འབད་ནི་ཨིནམ་སྦེ་ བཤད་ཡོདཔ་ཨིན་པས།

དེ་བཟུམ་སྦེ་ སྤྱི་ཟླ་འདི་ནང་ ཀོ་ལོ་རེ་ཌོ་མངའ་སྡེའི་ མངོན་མཐོ་ཁྲིམས་འདུན་ལས་ཡང་ ཊཱམ་གྱིས་ མངའ་སྡེ་དེ་ནང་གི་ བཙག་འཐུའི་ནང་ གྲལ་གཏོགས་འབད་མ་ཆོག་པའི་ འཁྲུན་ཆོད་བཏོན་ནུག།

ད་རེས་ མངའ་སྡེ་ ༢ ཀྱི་ བཙག་འཐུའི་ནང་ ཊཱམ་གྱིས་ གྲལ་གཏོགས་འབད་མ་ཆོགཔ་སྦེ་ བཟོ་མི་དེ་གིས་ ཊཱམ་ལུ་ རྒྱབ་འགལ་འབད་མི་ཚུ་ ངལ་རངས་ཏེ་ཡོད་རུང་ མཁས་མཆོག་མང་ཤོས་ཅིག་གིས་ མཐར་ཐུག་ལུ་ གནད་དོན་དེ་ ཡུ་ཨེཛ་གི་ མངོན་མཐོ་ཁྲིམས་འདུན་ལས་ མཐའ་གཏོགས་དགོ་ཟེར་ཨིན་པས།

ཊཱམ་གྱི་ བཙག་འཐུ་སྡེ་ཚན་གྱི་ མགྲིན་ཚབ་ཅིག་གིས་ མེ་ཡིན་མངའ་སྡེའི་དྲུང་ཆེན་ བེ་ལཱཛ་གིས་ སྲིད་འཛིན་བཙག་འཐུའི་ནང་ ལགཔ་རྐྱབ་ནི་དེ་ མ་རུངམ་ཅིག་ཨིན་ཟེར་བཤད་ནུག།

མགྲིན་ཚབ་དེ་གིས་ ཌེ་མེ་ཀེ་རེཊ་ སྲིད་ཚོགས་ཀྱི་ ཁོངས་གཏོགས་འབད་མི་ མངའ་སྡེ་ཚུ་གིས་ རྩ་ཁྲིམས་དང་མ་འཁྲིལ་བར་ ཨ་མི་རི་ཀའི་ མི་ཁུངས་ཀྱི་ ཚོགས་རྒྱན་གྱི་ ཐོབ་དབང་ཚུ་ བཀག་ཆ་འབད་དེ་ བཙག་འཐུའི་གྲས་ལས་ སྲིད་འཛིན་ཊཱམ་གྱི་མིང་ ཕྱིར་བཏོན་འབདཝ་སྦེ་ བཤདཔ་ཨིན་མས་ཟེར་ བཀོད་འདུག་པའི་གནས་ཚུལ།