ལྷུན་རྩེ་ཨའུ་མཚོ་རྣམ་གྲོལ་གླིང་དགོན་འཛིན་གྲྭ་ཚང་ནང་ བཙན་མཁར་དྲག་དམར་སྒྲོམ་མཆོད།

རང་ཟླ་ ༡༢ པའི་ཚེས་ ༡༠ སྤྱི་ཟླ་ ༡ པའི་ཚེས་ ༢༠ ལས་ ཉིན་གྲངས་ ༧ གྱི་རིང་ལུ་ དཔལ་ལྡན་འབྲུག་པའི་ ཆོས་ཀྱི་དབུ་ཁྲིད་དམ་པ་ རྗེ་མཁན་ཁྲི་རབས་ ༧༠ པ་ སྐྱབས་རྗེ་རིན་པོ་ཆེ་མཆོག་ དབུ་བཞུགས་ཐོག་ལས་ བླ་སློབ་དང་ དགེ་སློང་ཞལ་གྲངས་ ༢༠༠ ལྷགཔ་ཅིག་གིས་ ལྷུན་རྩེ་ཨའུ་ཚོ་རྣམ་གྲོལ་གླིང་ དགོན་འཛིན་གྲྭ་ཚང་ནང་སྦེ་ བཙན་མཁར་དྲག་དམར་སྒྲོམ་མཆོད་ ཐེངས་ ༣ པ་ གནངམ་ཨིན་པས།
དེ་ཡང་ སྤྱི་ལོ་ ༢༠༢༡ ལོར་ རྣམ་གྲོལ་གླིང་དགོན་འཛིན་གྲྭ་ཚང་དང་ བཙན་མཁར་རྒེད་འོག་ རྒྱ་རས་རྒེད་འོག་ སྨད་མཚོ་རྒེད་འོག་ ཙཀྐ་གླིང་རྒེད་འོག་ རྩ་མང་རྒེད་འོག་ ༥ ཐུན་མོང་ཐོག་ལུ་ སྦྱིན་བདག་འབད་དེ་ སྐྱབས་རྗེ་རིན་པོ་ཆེ་མཆོག་ རྗེ་མཁན་ཁྲི་རབས་ ༧༠ པའི་ གསེར་ཁྲིར་ཕེབས་ཏེ་ ཁྲི་ལོ་ ༢༥ འཁོར་བའི་ བཀའ་དྲིན་རྗེས་དྲན་ བརྩི་སྲུང་ཞུ་ནིའི་དོན་ལས་ འགོ་བཙུགས་གནང་ནུག།
དེ་མ་ཚད་ སྤྱིར་འགྲོ་བ་རིགས་དྲུག་གི་ སེམས་ཅན་ཐམས་ཅད་དང་ ལྷག་པར་དུ་ འབྲུག་རྒྱལ་ཁབ་འདི་ནང་ ནད་མུག་འཁྲུག་རྩོད་ལ་སོགས་པའི་ མིང་ཙམ་ཡང་མེད་པར་ དགའ་སྐྱིད་དང་ ཞི་བདེ་ཚུ་ཡང་ འབྱུང་ཐབས་ལུ་ཨིན་པས།
དྲག་དམར་སྒྲོམ་མཆོད་དེ་ རང་ཟླ་ ༡༢ པའི་ཚེས་ ༡༧ དང་ ༡༨ ལུ་ ཉིན་གྲངས་ ༢ ཀྱི་རིང་ གར་འཆམ་དང་ དངོས་གྲུབ་བླངས་ཆོག་ མཐོང་གྲོལ་ཚུ་ མི་དམངས་ལུ་ མཇལ་ཁ་གནང་ཐོག་ལས་ འགྲོལ་གནང་ནི་ཨིན་པའི་གནས་ཚུལ།

Please follow and like us: