ཡུ་ཨེཛ་གི་ གནམ་གྲུ་ཧེ་ལི་ཀོབ་ཊར་ཅིག་ལུ་ ཐུག་རྐྱེན་བྱུངམ་ལས་ མཚོ་ཐོག་དམག་མི་ ༥ བྱང་སྟོར།

ཨེ་བི་སི།
སྤྱི་ཟླ་ ༢ པའི་ཚེས་ ༩ ལུ་ ཡུ་ཨེཛ་མཚོ་དམག་སྡེ་ཚན་གྱིས་ བཤད་དོ་བཟུམ་འབད་བ་ཅིན་ ཁོང་གི་གནམ་གྲུ་ཧེ་ལི་ཀོབ་ཊར་ ༡ དམག་སྦྱོང་འབད་བའི་སྐབས་ལུ་ ཐུག་རྐྱེན་བྱུང་ཡོདཔ་ལས་ གནམ་གྲུའི་ནང་ཡོད་མི་ མཚོ་ཐོག་དམག་མི་ ༥ པོ་ག་ར་ལུ་ ཤི་རྐྱེན་བྱུང་ནུག་ཟེར་ཨིན་པས།
དེ་ཡང་ སྤྱི་ཟླ་ ༢ པའི་ཚེས་ ༦ གི་ཕྱི་རོ་ གནམ་གྲུ་དེ་ འཕུར་འགྱོ་བའི་ཤུལ་ལས་ གནམ་གྲུ་ཆགས་ཐང་ནང་ ལྷོད་ནི་གི་ དུས་ཚོད་རན་རུང་ ལྷོད་ནི་མེད་པར་ མཚོ་ཐོག་དམག་མི་ཚུ་གིས་ གནམ་གྲུ་དེ་ གར་སོང་མེད་པའི་ སྙན་ཞུ་འབད་ནུག།
དེ་སྦེ་ སྙན་ཞུ་ཐོབ་པའི་ཤུལ་ལུ་ མཚོ་ཐོག་དམག་མི་ཚུ་གིས་ སཱན་ཌི་ཡ་གོའི་ ཁྲིམས་དོན་ལས་ཁུངས་དང་ ཞི་བའི་མཁའ་འགྲུལ་ལས་ གྲོགས་རམ་ཚུ་ལེན་ཏེ་ འཚོལ་ཞིབ་འབད་ཡོདཔ་བཞིན་དུ་ སྤྱི་ཟླ་ ༢ པའི་ཚེས་ ༧ ལུ་ གནམ་གྲུ་དེ་ འཚོལ་ཐོབ་ཡོདཔ་ཨིན་པས།
སྤྱི་ཟླ་ ༢ པའི་ཚེས་ ༨ ལས་ གནམ་གྲུ་ཐུག་རྐྱེན་དེ་ནང་ ཤི་རྐྱེན་བྱུང་མིའི་ཕུངམོ་ཚུ་ འཚོལ་ནི་ལུ་ བརྩོན་ཤུགས་བསྐྱེད་དོ་ཡོདཔ་སྦེ་ མཚོ་ཐོག་དམག་མི་ཚུ་གིས་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: