འབྲུག༌གི༌དབང་པོ་སྐྱོན་ཅན་གྱི་ ཐོབ་དབང་མཐུན་གྲོས་ཀྱི་ ཆ་འཇོག་ཡིག་ཆ་དེ་ འཛམ་གླིང་སྤྱི་ཚོགས་ ཁྲིམས་དོན་ཡིག་ཚང་ལུ༌རྩིས༌སྤྲོད།

སྤྱི་ཟླ་ ༣ པའི་ཚེས་ ༡༣ ལུ་ ནིའུ་ཡོག་ལུ་ཡོད་མི་ འཛམ་གླིང་སྤྱི་ཚོགས་ནང་ འབྲུག་གི་གཏན་འཇགས་སྐུ་ཚབ་ཡིག་ཚང་གི་ དོན་གཅོད་འགོ་དཔོན་ ཕུན་ཚོགས་ནོར་བུ་གིས་ དབང་པོ་སྐྱོན་ཅན་གྱི་ ཐོབ་དབང་མཐུན་གྲོས་ཀྱི་ ཆ་འཇོག་ཡིག་ཆ་དེ་ འཛམ་གླིང་སྤྱི་ཚོགས་ ཁྲིམས་དོན་ཡིག་ཚང་གི་ ཆིངས་ཡིག་ལས་ཚན་གཙོ་འཛིན་ ཌེ་ཝིཌ་ ན་ནོ་པུ་ལོཛ་ལུ་ རྩིས་སྤྲོད་འབད་ནུག།
དབང་པོ་སྐྱོན་ཅན་གྱི་ ཐོབ་དབང་མཐུན་གྲོས་དེ་ འབྲུག་གིས་ཆ་འཇོག་འབད་བའི་ཤུལ་ལས་ འཛམ་གླིང་སྤྱི་ཚོགས་ཀྱི་ འཐུས་མི་རྒྱལ་ཁབ་ ༡༩༡ མཐུན་གྲོས་དེ་གི་ འཐུས་མིའི་གྲངས་སུ་ ཚུད༌ནི༌ཨིནམ༌ད༌ འབྲུག་རྒྱལ་ཁབ་ཀྱིས་ དབང་པོ་སྐྱོན་ཅན་གྱི་ ཐོབ་དབང་མཐུན་གྲོས་གུ་ སྤྱི་ལོ་ ༢༠༡༠ སྤྱི་ཟླ་ ༩ པའི་ཚེས་ ༢༡ ལུ་ མཚན་རྟགས་བཀོད་ཡོདཔ༌ཨིན༌པས།
འཛམ་གླིང་སྤྱི་ཚོགས་ཀྱི༌ དབང་པོ་སྐྱོན་ཅན་གྱི་ ཐོབ་དབང་མཐུན་གྲོས་དེ་ སྤྱི༌ཚོགས༌ ༣ པའི༌ འབྲུག༌གི༌རྒྱལ་ཡོངས་ཚོགས་འདུའི་ ཚོགས་ཐེངས་ ༡༠ པ་དང་ རྒྱལ་ཡོངས་ཚོགས་སྡེ་ ༤ པའི་ ཚོགས་ཐེངས་ ༣༢ པའི་ནང་ལས་ སྤྱི་ལོ་ ༢༠༢༣ ལུ་ ཆ་འཇོག་མཛད་ནུག།
དབང་པོ་སྐྱོན་ཅན་གྱི་ ཐོབ་དབང་མཐུན་གྲོས་དེ་ རྒྱལ་སྤྱི་འགྲོ་བ་མིའི་ ཐོབ་དབང་ཆིངས་ཡིག་ཅིག་ཨིནམ་ད་ མཐུན༌གྲོས༌དེ་ དབང་པོ་སྐྱོན་ཅན་ཚུ༌ལུ༌ འགྲོ་བ་མིའི་ཐོབ་དབང་ཡོངས་རྫོགས་ གོང་འཕེལ་དང་ ཉེན་སྲུང་ དེ་ལས་ ངེས་གཏན་བཟོ་ནི༌གི་ ཆིངས་ཡིག་ཅིག་ཨིན་པས།
དེ་ཡང་ སྤྱི་ལོ་ ༢༠༠༦ སྤྱི་ཟླ་ ༡༢ པའི་ཚེས་ ༡༣ ལུ་ འཛམ་གླིང་སྤྱི་ཚོགས་ཀྱི༌་ཡིག་ཚང་གཙོ་ཁང་ནང་ལས་ ཆ་འཇོག་གྲུབ་སྟེ་ སྤྱི་ལོ་ ༢༠༠༨ སྤྱི་ཟླ་ ༥ པའི་ཚེས་ ༣ ལས་ ཆ་གནས་སྤེལ་ཡོད་པའི་གནས་ཚུལ།

Please follow and like us: