མི་རྗེ་བློན་ཆེན་མཆོག་གིས་ བལྟ་བཤལ་ལས་སྡེའི་ དྲི་བཀོད་ལས་རིམ་ཅིག་ནང་ གྲལ་གཏོགས་མཛད་ཡོདཔ།

སྤྱི་ཟླ་ ༣ པའི་ཚེས་ ༡༥ ལུ་ མི་རྗེ་བློན་ཆེན་མཆོག་གིས་ རྒྱ་གར་གྱི་ གློག་མེ་དང་ སླར་འབྱུང་ནུས་ཤུགས་བློན་པོ་ རཱཤ་ཀུ་མར་སིང་དང་ མཇལ་ཕྲད་ཐོག་ལུ་ ནུས་ཤུགས་ལས་སྡེའི་ནང་ མཉམ་འབྲེལ་གྱི་ བརྩོན་ཤུགས་སྐོར་ལས་ གསུང་གྲོས་ཚུ་ གནང་ཡོདཔ་ཨིན་པས།
དེ་མ་ཚད་ ཨ་ད་ནི་སྡེ་ཚན་ གཞི་བཙུགས་འབད་མི་དང་ ཁྲི་འཛིན་ གའུ་ཏམ་ཨ་ད་ནི་དང་ཡང་ མཇལ་ཕྲད་མཛད་དེ་ འབྲུག་ལུ་ དཔལ་འབྱོར་གོང་འཕེལ་འཆར་གཞི་དང་ ལས་འགུལ་ཚུ་ནང་ མཉམ་འབྲེལ་གྱི་ གནད་དོན་ཚུ་གི་སྐོར་ལས་ གསུང་གྲོས་གནང་ནུག།
དེ་ཚེ་ཕྱི་རོ་ རྒྱ་གར་གྱི་ ཚོང་སྡེ་དང་ བཟོ་གྲྭ་ཚོགས་སྡེ་གིས་ སྤྲོ་སྟོན་ལས་རིམ་ཅིག་ འགོ་འདྲེན་འཐབ་མིའི་ནང་ མི་རྗེ་བློན་ཆེན་གྱིས་ རྒྱལ་ཡོངས་དགའ་སྐྱིད་དཔལ་འཛོམས་ལུ་ བརྩི་བཀུར་ཐོག་ལས་ འབྲུག་གི་ཡུན་བརྟན་ཅན་གྱི་ བལྟ་བཤལ་གྱི་ ངོ་རྟགས་སྐོར་ལས་ གསུང་བཤད་གནང་ཡོདཔ་མ་ཚད་ འབྲུག་གི་བལྟ་བཤལ་ལས་སྡེའི་ དྲི་བཀོད་ལས་རིམ་ཅིག་ནང་ཡང་ གྲལ་གཏོགས་མཛད་དེ་ འབྲུག་ལུ་ རྒྱ་གར་གྱི་ བལྟ་བཤལཔ་ཚུ་ འོང་ཐབས་ཀྱི་ བསམ་འཆར་དང་ བར་འཛུལ་ཚུ་གི་སྐོར་ལས་ཡང་ གསུང་གྲོས་ཚུ་ གནང་ཡོདཔ་ཨིན་པས།
དེ་བཟུམ་སྦེ་ རྒྱ་འབྲུག་མཐུན་འབྲེལ་ཚོགས་པའི་ འཐུས་མི་ཚུ་དང་གཅིག་ཁར་ཡང་ ཞལ་འཛོམས་ཅིག་ འཚོགས་གནང་པའི་སྐབས་ལུ་ མཐུན་འབྲེལ་ཚོགས་པ་དེ་གིས་ རྒྱ་འབྲུག་རྒྱལ་ཁབ་ ༢ ཀྱི་ མི་སེར་ཚུ་གི་བར་ན་ དམིགས་བསལ་གྱིས་ མཐུན་ལམ་གོང་འཕེལ་བཏང་ནི་ལུ་ བརྩོན་ཤུགས་བཀོད་མི་ལུ་ བཀྲིན་དགའ་ཚོར་ཡོད་ལུགས་ཚུ་ གསུངས་ཡོད་པའི་གནས་ཚུལ།

Please follow and like us: