པ་ཀིཛ་ཏཱན་ལུ་ གནས་སྐོརཔ་འབག་མི་ སྐྱེལ་འདྲེན་སྣུམ་འཁོར་བཱཛ་ཅིག་ལུ་ ཐུག་རྐྱེན་བྱུང་སྟེ་ མི་གྲངས་ ༡༧ ལུ་ ཤི་རྐྱེན་དང་ གཞན་མི་ ༡༦ ལུ་རྨ་སྐྱོན།

ཨེ་བི་སི།
སྤྱི་ཟླ་ ༤ པའི་ཚེས་ ༡༡ ལུ་ གནས་སྐོརཔ་འབག་འགྱོ་མི་ སྐྱེལ་འདྲེན་སྣུམ་འཁོར་བཱཛ་ཅིག་ ལྷོ་ནུབ་པ་ཀིཛ་ཏཱན་གྱི་ གཡུར་བ་གཏིང་རིངམོ་ཅིག་ནང་ བུད་སོངཔ་ལས་ མི་གྲངས་ ༡༧ ལུ་ ཤི་རྐྱེན་དང་ གཞན་མི་ ༡༦ ལུ་ རྨ་སྐྱོན་བྱུང་ཡོདཔ་ཨིན་པས།
དེ་ཡང་ སྤྱི་ཟླ་ ༤ པའི་ཚེས་ ༡༠ གྱི་ནུབ་མོར་ བཱ་ལུ་ཅིཛ་ཏཱན་ཟེར་སར་ མུཛ་ལིམ་ཆོས་ལུགས་ཀྱི་ དུས་སྟོན་ཨིཌ་ཟེར་མི་ བརྩི་སྲུང་གི་དོན་ལས་ འགྲུལ་བསྐྱོད་འབད་བའི་སྐབས་ལུ་ ཐུག་རྐྱེན་བྱུང་ནུག།
མི་གྲངས་ ༣༣ འབག་མི་ སྐྱེལ་འདྲེན་བཱཛ་དེ་ ལྷ་ཁང་ཡོད་སར་ ལྷོད་ནི་ལུ་ ཀི་ལོ་མི་ཊར་ ༢༥ དེ་ཅིག་གི་ས་ཁར་ ལཱཛ་བེ་ལ་ རྫོང་ཁག་ནང་ལྷོདཔ་ད་ དེད་གཡོགཔ་གིས་ བཀག་འཛིན་འབད་མ་ཚུགས་པར་ ཐུག་རྐྱེན་བྱུང་ནུག་ཟེར་ཨིན་པས།
ཐུག་རྐྱེན་དེ་ནང་ རྨ་སྐྱོན་བྱུང་མི་ཚུ་གི་གྲས་ལས་ གནས་སྟངས་འཚུབ་དྲགས་སྦེ་ཡོད་མི་ ནདཔ་ ༡༥ པོ་དེ་ ཉེ་འདབས་ཀྱི་མངའ་སྡེ་ སིནཐ་ཟེར་མིའི་ སྨན་ཁང་ཅིག་ནང་ སྤོ་བཤུད་འབད་ནུག་ཟེར་ བཀོད་འདུག་པའི་གནས་ཚུལ།

Please follow and like us: