བྱང་ཀོ་རི་ཡའི་ སྲིད་འཛིན་ཀིམ་གྱིས་ ཕྱད་མདའི་དོན་ལས་ གྲ་སྒྲིག་ཐོག་ལུ་ སྡོད་དགོ་པའི་བཀོད་རྒྱ།

ཨཱལ་ཇ་ཟི་ར།
སྤྱི་ཟླ་ ༤ པའི་ཚེས་ ༡༡ ལུ་ བྱང་ཀོ་རི་ཡའི་སྲིད་འཛིན་ ཀིམ་ཇོང་ཨཱན་གྱིས་ དྲག་པོའི་གཙུག་ལག་སློབ་སྡེའི་ནང་ གཟིགས་སྐོར་གནང་པའི་སྐབས་ལུ་ ཕྱད་མདའི་དོན་ལས་ དུས་ནམ་ར་འབད་རུང་ གྲ་སྒྲིག་འབད་དེ་ སྡོད་དགོཔ་སྦེ་གསུངས་ནུག།
སྲིད་འཛིན་ཀིམ་གྱིས་ གསུངས་དོ་བཟུམ་འབད་བ་ཅིན་ ད་རེས་ནངས་པར་ སྲིད་དོན་གྱི་ གནས་སྟངས་ཚུ་ བརྟན་ཏོག་ཏོ་མེད་པའི་ དུས་སྐབས་ནང་ ཕྱད་མདའི་དོན་ལས་ སྔོན་ཆད་མ་འབད་བའི་ གྲ་སྒྲིག་མཐིལ་ཕྱིན་སྦེ་ སྡོད་དགོ་ཟེར་ཨིན་པས།
འཕྲལ་ཁམས་ཀྱི་ ཟླཝ་ཚུ་ནང་ བྱང་ཀོ་རི་ཡ་གིས་ ལྷོ་ཀོ་རི་ཡའི་ མཐུན་འབྲེལ་རྒྱལ་ཁབ་ ཡུ་ཨེཛ་གི་ རྒྱབ་འགལ་ལུ་ ཁ་ཉེས་ཚུ་ ཡར་སེང་ཅན་སྦེ་ར་ བཀལ་ཏེ་ཡོདཔ་ད་ དེ་ཡང་ ལྷོ་ཀོ་རི་ཡ་དང་ ཡུ་ཨེཛ་གིས་ ཕྱད་མདའི་དམག་སྦྱོང་ཚུ་ རྒྱ་སྐྱེད་ཐོག་ལས་ འགོ་འདྲེན་འཐབ་སྟེ་ དྲག་པོའི་མཐུན་ལམ་ཚུ་ལུ་ གནོད་པ་རྐྱབ་ཡོད་པའི་ ཁ་ཉེས་ཚུ་ཡང་བཀལ་ནུག།
མདང་ཞག་ སྤྱི་ཟླ་ ༣ པའི་ནང་ཡང་ བྱང་ཀོ་རི་ཡའི་ སྲིད་འཛིན་གྱིས་ རྒྱལ་ཁབ་ཀྱི་ ནུབ་ཕྱོགས་ལུ་ཡོད་མི་ དྲག་པོའི་དམག་སྒར་ནང་ ཞིབ་དཔྱད་མཛདཔ་ད་ཡང་ ཕྱད་མདའི་དོན་ལུ་ སྔར་བ་ལྷགཔ་སྦེ་ གྲ་སྒྲིག་འབད་དགོ་པའི་ བཀོད་རྒྱ་གནང་ཡོདཔ་ཨིན་པས།
སྤྱི་ལོ་ ༢༠༢༢ ལོར་ ལྷོ་ཀོ་རི་ཡ་ལུ་ སྲིད་འཛིན་ཡུན་སུག་ཡེ་ཨོལ་དེ་ བཙག་འཐུ་གྲུབ་ཞིནམ་ལས་ཚུར་ བྱང་ཀོ་རི་ཡ་གིས་ ལྷོ་ཀོ་རི་ཡ་དེ་ ཁོང་གི་བྱང་ཕྱད་གཙོ་བོ་ཅིག་ཨིནམ་སྦེ་ གསལ་བསྒྲགས་འབདཝ་ལས་ རྒྱལ་ཁབ་ ༢ ཀྱི་བར་ན་ མཐུན་ལམ་མེདཔ་ཐལ་ནུག།
སྲིད་འཛིན་ཡུན་གྱིས་ བྱང་ཀོ་རི་ཡ་དང་གཅིག་ཁར་ མཐུན་ལམ་མེད་པའི་ གནས་སྟངས་དེ་ འཕྲོ་མཐུད་དེ་ར་ སྒྲིང་སྒྲིང་སྦེ་ རྒྱུན་སྐྱོང་འཐབ་སྟེ་ཡོདཔ་ལས་ བྱང་ཀོ་རི་ཡའི་ སྲིད་འཛིན་ཀིམ་གྱིས་ རྒྱལ་ཁབ་ ༢ གཅིག་ཁར་བསྡོམ་ནིའི་དོན་ལུ་ ལཱ་འབད་མི་ ལས་སྡེ་ཚུ་ཡང་ ཆ་མེད་བཏང་སྟེ་ ལྷོ་ཀོ་རི་ཡ་གིས་ བྱང་ཀོ་རི་ཡའི་ས་ཆ་ མི་ལི་མི་ཊར་ ༠.༠༠༡ དེ་ཅིག་གི་ནང་ར་ ཧམ་འཛུལ་འབད་རུང་ ཕྱད་མདའ་ལང་ནི་ཨིན་པའི་ ཉེན་བརྡ་འབད་ནུག་ཟེར་ བཀོད་འདུག་པའི་གནས་ཚུལ།

Please follow and like us: