ཧའེ་ཏི་ལུ་ དབང་བཙོང་སྡེ་ཚན་ཚུ་གིས་ གནོདཔ་བཀལ་ཏེ་ མི་ལེ་ཤ་ཅིག་དམར་བསད།

རོའི་ཊརཛ།
སྤྱི་ཟླ་ ༤ པའི་ཚེས་ ༡༩ ལུ་ འཛམ་གླིང་སྤྱི་ཚོགས་ཀྱིས་ གསལ་སྟོན་འབད་མི་ སྙན་ཞུ་དང་འཁྲིལ་བ་ཅིན་ ཧའེ་ཏི་ལུ་ སྤྱི་ཟླ་ ༡ པ་ལས་ སྤྱི་ཟླ་ ༣ པའི་བར་ན་ དབང་བཙོང་སྡེ་ཚན་ཚུ་གིས་ གནོདཔ་བཀལ་བའི་ བྲེལ་ཟིང་ནང་ མི་གྲངས་ ༢,༥༠༠ ལྷགཔ་ཅིག་ལུ་ ཤི་རྐྱེན་བྱུང་ནུག་ཟེར་ཨིན་པས།
དེཡང་ མང་ཤོས་ར་ ཧའེ་ཏིའི་རྒྱལ་ས་ པོཊ་ཨའོ་པི་རིནཛ་ལུ་ གནོདཔ་བཀལ་ཏེ་ མི་གྲངས་ ༤༣༨ དེ་ཅིག་ བཙན་ཁྲིད་འབད་ཡོདཔ་མ་ཚད་ ཁྲིམས་སྲུང་འགག་སྡེའི་ སྒྲིང་ཁྱིམ་ ༢༢ དེ་ཅིག་ཡང་ འཕྲོག་བཅོམ་འབད་དེ་ མེར་བཏང་ཡོདཔ་སྦེ་བཀོད་ནུག།
དེ་སྦེ་ ཤི་རྐྱེན་བྱུང་མི་ ལ་ལོ་ཅིག་ དབང་བཙོང་སྡེ་ཚན་གྱི་ གྲས་ཁར་མིན་མི་དང་ ལ་ལོ་ཅིག་ དབང་པོ་སྐྱོན་ཅན་ཚུ་ཨིན་པའི་ཁར་ བྲེལ་ཟིང་དེ་ཚུའི་ནང་ ཁྲིམས་སྲུང་འགག་པ་ ༡༩ ལུ་ཡང་ ཤི་རྐྱེན་བྱུང་ཡོདཔ་ཨིན་པས།
འཛམ་གླིང་སྤྱི་ཚོགས་ཀྱིས་ ཧའེ་ཏི་ལུ་ འཆར་གཞི་ལེགས་ཤོམ་ཡོད་མི་ སྲུང་སྐྱོབ་རིམ་ལུགས་ གཞི་བཙུགས་དང་ འགྲུལ་ལམ་ཚུ་ ཉེན་སྲུང་དང་ལྡནམ་སྦེ་བཟོ་སྟེ་ གོ་མཚོན་ནག་ཚོང་ཚུ་ བཀག་དམ་འབད་དགོ་པའི་ཁར་ བཀྲ་མ་ཤིས་པའི་ སྡེ་ཚན་ཚུ་ནང་ འཛུལ་ཞུགས་འབད་དོ་ཡོད་མི་ ཨ་ལོ་ཚུ་གི་ ཀུན་སྤྱོད་ལེགས་སྒྱུར་གྱི་ ལས་རིམ་ཚུ་ཡང་ འགོ་འདྲེན་འཐབ་དགོཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: