ཐིམ་ཕུ་སྒྱིད་དར་གོངམ་ལུ་ རྒྱལ་འཛིན་འབུ་ནད་སྨན་ཁང་ལྟེ་བ་ བཟོ་བསྐྲུན་གྱི་དོན་ལས་ གནང་བྱིན་ཆིངས་ཡིག།

སྤྱི་ཟླ་ ༤ པའི་ཚེས་ ༡༧ ལུ་ རྒྱ་པཱན་རྒྱལ་སྤྱི་མཉམ་འབྲེལ་ལས་སྡེ་དང་ འབྲུག་གཞུང་དངུལ་རྩིས་ལྷན་ཁག་གི་བར་ན་ ཐིམ་ཕུ་སྒྱིད་དར་གོངམ་ལུ་ རྒྱལ་འཛིན་འབུ་ནད་སྨན་ཁང་ལྟེ་བ་ཅིག་ གསར་བསྐྲུན་གྱི་དོན་ལས་ མ་དངུལ་ལྷན་ཐབས་སྦེ་ དངུལ་ཀྲམ་ཐེར་འབུམ་ ༢ གྲོགས་རམ་སྦེ་ བྱིན་ནི་ཨིན་པའི་ གནང་བྱིན་ཆིངས་ཡིག་ལུ་ མཚན་རྟགས་བཀོད་ནུག།
མ་དངུལ་དེ་ཡང་ འགོ་ཐོག་ལས་འགུལ་གྱི་ ཟད་རྩིས་བཏོན་མི་ དངུལ་ཀྲམ་ཐེར་འབུམ་ ༡.༦ ལུ་ ཁ་སྐོང་སྦེ་ བྱིན་ནི་ཨིནམ་ད་ སྨན་ཁང་ལྟེ་བ་དེ་གིས་ རྒྱལ་ཁབ་ནང་ འབུ་ནད་བཀག་ཐབས་དང་ འཛིན་སྐྱོང་གི་ ཞབས་ཏོག་ཚུ་ བྱིན་ནི་ཨིན་པས།
སྨན་ཁང་ལྟེ་བ་ གསར་བསྐྲུན་འབད་ནི་ཨིན་མི་དེ་ནང་ འབུ་ནད་སྔོན་འགོག་དང་ ཚད་འཛིན་ འཛིན་སྐྱོང་ཚུ་གི་དོན་ལུ་ དེང་དུས་དང་བསྟུན་པའི་ མཐུན་རྐྱེན་དང་ ནད་བརྟག་ཡོངས་རྫོགས་ དེ་ལས་ མི་མང་འཕྲོད་བསྟེན་གྱི་ ལྕོགས་གྲུབ་ཚུ་ཡོདཔ་སྦེ་ བཟོ་ནི་ཨིནམ་ད་ སྨན་ཁང་ལྟེ་བ་དེ་ ལོ་ངོ་ ༣ གྱི་ ནང་འཁོད་ལུ་ བསྒྲུབ་ནི་སྦེ་ཨིན་པའི་གནས་ཚུལ།

Please follow and like us: