མ་ལེ་ཤི་ཡའི་ བློན་ཆེན་བགྲེསཔ་ལུ་ ཁོ་རའི་བུཚ་ཚུ་གིས་ གྲལ་གཏོགས་ཡོད་མི་ སྲིད་འབྲེལ་ངན་ལྷད།

ཨཱལ་ཇ་ཟི་ར།
སྤྱི་ཟླ་ ༤ པའི་ཚེས་ ༢༥ ལུ་ མ་ལེ་ཤི་ཡའི་ བློན་ཆེན་བགྲེསཔ་ མ་ཧཱ་ཐིར་ མོ་ཧ་མེད་དེ་ ཁོ་རའི་བུཚ་ཚུ་གིས་ སྲིད་འབྲེལ་ངན་ལྷད་འབད་མི་ལུ་ ཞིབ་དཔྱད་འབད་དོ་ཡོདཔ་ཨིན་པས།
དེ་ཡང་ བར་སྐབས་ཅིག་ཁར་ སྐྱེས་ལོ་ ༩༨ འབད་མི་ མ་ཧ་ཐིར་དང་ འབྲེལ་བ་དམ་ཟབ་ཡོད་པའི་ སྲིད་འབྲེལ་གྱི་མི་ངོམ་ཚུ་ སྲིད་འབྲེལ་ངན་ལྷད་དང་འབྲེལ་བའི་ ཞིབ་དཔྱད་ཚུ་ ཡར་སེང་གི་སྐོ་ལས་ ལག་ལེན་འཐབ་དོ་ཡོདཔ་ད་ མ་ཧཱ་ཐིར་དེ་ ཡུན་རིང་གི་བར་ན་ ད་རེས་ཀྱི་བློན་ཆེན་ ཨཱན་ཝར་ཨི་བར་ཧིམ་གྱི་ བྱང་ཕྱད་སྦེ་སྡོད་ནུག།
ཨིན་རུང་ ཨཱན་ཝར་གྱིས་འབད་བ་ཅིན་ ཞིབ་དཔྱད་དེ་ ཆེ་མཐོའི་ངན་ལྷད་སྐོར་ལས་ གཞུང་གི་བརྩོན་ཤུགས་ཅིག་ཨིནམ་མ་གཏོགས་ སྲིད་དོན་དང་འབྲེལ་བ་ མེད་ཟེར་ ཨིན་པས།
མདང་ཞག་ སྤྱི་ཟླ་ ༡ པའི་ནང་ མ་ལེ་ཤི་ཡའི་ ངན་ལྷད་བཀག་སྡོམ་ལྷན་ཚོགས་ཀྱིས་ མ་ཧཱ་ཐིར་གྱི་བུ་ མིར་ཛཱན་དང་ མོག་ཛ་ནི་ ༢ ལུ་ ཁོང་རའི་རྒྱུ་དངོས་ཚུ་ གསལ་སྟོན་འབད་དགོ་པའི་ བརྡ་དོན་སྤྲོད་ཡོདཔ་ད་ དེ་ཡང་ ཕྱིའི་རྒྱལ་ཁབ་ཚུ་དང་ མ་དངུལ་དང་ ཚོང་འབྲེལ་གྱི་ ཐོ་ཡིག་ཚུ་ ཞིབ་དཔྱད་འབད་ནི་དང་བསྟུན་ཏེ་ཨིན་པས།
མ་ལེ་ཤི་ཡའི་ ངན་ལྷད་བཀག་སྡོམ་ལྷན་ཚོགས་ཀྱི་ ལྷན་འཛིན་སྤྱི་ཁྱབ་ ཨ་ཛམ་བ་ཀི་གིས་ མ་ཧཱ་ཐིར་གྱི་ བུཚ་ཚུ་གིས་ ཞིབ་དཔྱད་ཀྱི་སྐོར་ལས་ ཁ་གསལ་ཅིག་ ག་ནི་ཡང་ བཤད་མ་བཏུབ་ཨིན་པས་ཟེར་ བཀོད་འདུག་པའི་གནས་ཚུལ།

Please follow and like us: